Azərbaycan, Bakı, 4 aprel /Trend, müxbir A.Axundov/
Azərbaycan Turizm Assosiasiyası gələn həftə turizm şirkətlərində monitorinqin ikinci mərhələsinə başlayır. Bu barədə bazar ertəsi Trend-ə Azərbaycan Turizm Assosiasiyasının (AzTA) rəhbəri Nahid Bağırov deyib.
Azərbaycan Mədəniyyət və Turizm Nazirliyinin məlumatına görə, ölkədə 207 turizm şirkəti fəaliyyət göstərir.
Bağırovun sözlərinə görə, hələlik monitorinqlər Bakıda keçirilir. Belə ki, şirkətlərin çoxunun ofisi ölkə paytaxtında yerləşir.
"Lakin gələcəkdə biz mehmanxana və digər turizm obyektlərini yoxlamağı planlaşdırırıq və bu zaman regionlara da reydlərə gedəcəyik", - Bağırov bildirib.
Onun sözlərinə görə, monitorinqin predmeti turizm şirkətlərinin Mədəniyyət və Turizm Nazirliyinin və ölkə turizminin tələblərinə uyğun olması, göstərilən xidmətlərin keyfiyyəti və digər məsələlər olacaq.
"Monitorinqin yekunları üzrə şirkətlərdə müxtəlif pozuntular aşkar edilərək qarşısı alınır", - Bağırov vurğulayıb.
Assosiasiya rəhbərinin sözlərinə görə, pozuntunun ən aydın növü hüquqi ünvanın faktiki ünvana uyğun olmamasıdır.
"Biz lisenziyasız turizm fəaliyyəti ilə məşğul olan bir neçə müəssisə aşkar etmişik. Belə hallarda qanunvericiliyə uyğun olaraq onlar fəaliyyətlərini dayandırırlar", - Bağırov qeyd edib.
Azərbaycan Turizm Şirkətləri Assosiasiyası 2009-cu ilin yanvarında Mədəniyyət və Turizm Nazirliyinin dəstəyi ilə yaradılıb. Ötən il Mehmanxanalar Assosiasiyası ilə birləşib.
Assosiasiyanın əsas fəaliyyət istiqamətləri turizm şirkətlərinin maraqlarının qorunması, qanun layihələrinin işlənib hazırlanması, milli turizm şirkətinin yaradılmasına yardım, bazar iştirakçıları üçün təlim və seminarların keçirilməsi üzrə planın hazırlanması, Azərbaycan turizminin illik beynəlxalq sərgilərdə potensial reklam və təşviqatı üçün şərtlərin yaradılması, daxili turizmin inkişafı və dünya bazarında turizm məhsullarının təqdim olunmasıdır.
Həmçinin, fəaliyyət istiqamətlərinə konqres turizminin inkişafı və tətbiqi, idarəetmə və xidmət sahəsində peşəkar kadrların hazırlanmasına yardım, turizm sahəsində adekvat vergi qoyuluşunun yaradılması və normativ nizamlamalar, standartlaşdırma, sertifikatlaşdırma və lisenziyalaşdırmanın inkişafına yardım, beynəlxalq turizm şirkətləri ilə əməkdaşlıq, rəsmi nəşriyyat orqanının yaradılması, hüquqi məsləhətləşmələr sahəsində xidmətlər, normativ-hüquqi bazanın inkişafı çərçivəsində turizm şirkətlərinin hüquqlarının qorunması sahəsində əməkdaşlıq daxildir.
