Azərbaycan, Bakı, 8 iyun /Trend, müxbir A.Axundov/
Avropa Yenidənqurma və İnkişaf Bankı (AYİB) Azərbaycan Mərkəzi Bankına ölkənin bank bazarına xarici strateji bank qruplarının daxil olmasını təşviq etməyi tövsiyə edir. Çərşənbə günü AYİB-in Azərbaycandakı nümayəndəliyinin rəhbəri Frensis Deleyin dediyinə görə, bu gün Azərbaycanda xarici kapitalın iştirakı üçün heç bir məhdudiyyət yoxdur, lakin buna baxmayaraq, ölkənin bank sektorunda xarici strateji investorlar çatışmazlığı var.
"Xarici investisiyalar təkcə pul deyil, bu həm də innovasiya və təcrübədir, buna görə bazara xarici strateji bank qruplarının daxil olmasını təşviq etmək lazımdır", - Deley qeyd edib.
Onun sözlərinə görə, bank sektorunda dövlətə məxsus Azərbaycan Beynəlxalq Bankı dominantlıq edir. O, ölkənin bank aktivlərinin təxminən 40 fazini təmsil edir.
"ABB-nin özəlləşdirilməsi 10 yaxın orta və 33 kiçik bankın daxil olduğu sektorda rəqabəti artıracaq", - Deley qeyd edib.
Onun fikrincə, kiçik bankların birləşməsi kapitallaşdırmanı, inamı və ölkənin bank sektorunun effektivliyini artıracaq.
"AMB əsasən bunu dəsətəkləyir", - Deley qeyd edib.
O hesab edir ki, bank sektorunda əlavə struktur dəyişiklikləri maliyyədən istifadə ilə bağlı vəziyyəti yaxşılaşdıracaq.
"İş adamları şikayət edirlər ki, bank kreditləri üzrə faiz dərəcələri 20 faiz olmaqla yüksəkdir. Bu halda onların verilmə müddəti isə 3 ili ötmür", - AYİB nümayəndəliyinin rəhbəri qeyd edib.
AYİB ölkədə fəaliyyətə başlayandan Azərbaycan iqtisadiyyatına 118 layihənin həyata keçirilməsi üçün 1,6 milyard dollar investisiya edib. Bankın cari portfeli bir milyard dollar təşkil edir.
İnvestisiyaların 48 faizi Azərbaycanın energetika sektoruna, 23 faiz isə korporativ sektora, 18 faizi maliyyə, 13 faizi infrastruktura yönəlib.
Hazırda AYİB ölkənin doqquz bankı, 5 mikromaliyyə təşkilatı və üç bank olmayan kredit təşkilatı ilə əməkdaşlıq edir.
