Azərbaycan, Bakı, 2 iyul /Trend, müxbir A.Axundov/
Bugünədək Azərbaycan Maliyyə Nazirliyi tərəfindən ölkədə fəaliyyət göstərən 29 sığorta şirkətindən (o cümlədən bir təkrar sığorta şirkətinə) 16-na sığorta fəaliyyəti üçün müddətsiz lisenziya verilib. Bu barədə şənbə günü Trend-ə Maliyyə Nazirliyi yanında Dövlət Sığorta Nəzarəti Xidmətindən məlumat verilib.
Son belə lisenziya 2011-ci il iyulun 1-də Paşa Sığorta şirkətinə verilib.
2008-ci ilin martından qüvvəyə minən "Sığorta fəaliyyəti haqqında" qanuna uyğun olaraq, bu gün ölkədə sığorta fəaliyyətinə icazə müddətsiz dövr üzrə verilir, halbuki əvvəllər lisenziya beş il müddətinə verilirdi. Yeni yaradılan şirkətlərə ilk lisenziya beş il müddətinə verilir.
Şirkətlər müddətsiz lisenziya almaq üçün qüvvədə olan lisenziyanın müddəti başa çatanda müraciət edə bilərlər. Hazırda DSNX 16 şirkətin sığorta fəaliyyəti üzrə icazəsini yeniləyib, yerdə qalan şirkətlərin lisenziyalaşdırılması prosesi isə yeni qanunvericiliyə uyğun olaraq 2016-cı ildə tam başa çatacaq.
İki sığorta şirkətinin (AzSığorta və Başak-İnam Sığorta) lisenziyalarının müddəti 2011-ci ildə, yedii sığorta şirkətinin (Temz Sığorta Qrupu, Atəşgah Sığorta, Azərbaycan Sənaye Sığorta, Meqa Sığorta, Beynəlxalq Sığorta Şirkəti, Qarant Sığorta, Standard İnsurance) və yeganə təkrrasığorta şirkəti AzRE-nin 2012-ci ildə, iki şirkətin (Alfa Sığorta və Qala Həyat Sığorta) - 2013-cü ildə, Paşa Həyat Sığorta şirkətinin 2016-cı ildə başa çatır.
Ölkədə fəaliyyət göstərən şirkətlərin mükafatlarının ümumi həcmi ilin ilk beş ayı ərzində 86,453 milyon manat (bir il ərzində artım 29,2 faiz), hesabat dövründə ödənişləri 22,195 milyon manat (19,9 faizlik artımla) təşkil edib.
İyulun ikisinə rəsmi məzənnə 0,7867 AZN/USD təşkil edir.
