Azərbaycan, Bakı, 1 noyabr /Trend, müxbir E.İsmayılov/
Cari ilin noyabr ayının 15-dək "Azərbaycan Dəmir Yolları" QSC daxili və xarici reyslər üzrə biletlərin onlayn-satışına başlayacaq. Bu barədə Trend-ə çərşənbə axşamı QSC-nin mətbuat xidmətinin rəhbəri Nadir Əzməmmədov deyib.
"Bu proses başa çatmaq üzrədir. Planlaşdırılır ki, noyabrın 15-dək bütün reyslər üzrə biletlərin onlayn-satışına başlanacaq", - o qeyd edib.
Əzməmmədovun sözlərinə görə, biletləri QSC-nin üç dildə olan (Azərbaycan, ingilis və rus) internet saytı ilə əldə etmək mümkün olacaq.
Biletləri onlayn əldə etmək üçün sərnişinin özünün bank hesabı olmalıdır. Sərnişin bu yolla biletin pulunu ödəyə biləcək. Qatarın yola düşməsinə minimum bir saat qalmış internet vasitəsilə bilet əldə edən sərnişin bilet aldığını təsdiq etmək üçün QSC-nin kassalarının birində qeydiyyatdan keçməlidir.
Əgər əvvəllər sərnişinlər beynəlxalq reyslər üzrə Bakıda hər iki tərəfə bilet əldə edə bilmirdilərsə, biletlərin satışı üçün onlayn-sistemin tətbiqi ilə onlar bütün reyslər üzrə bu xidmətdən istifadə edə biləcəklər.