Xəzəryanı ölkələrin Hesablama palataları birgə yoxlamalara başlayacaqlar
Azərbaycan, Bakı, 2 noyabr /Trend müxbir A. Axundov/
Xəzəryanı ölkələrin Hesablama palataları gələn ildən etibarən Xəzərdə ekologiya məsələləri ilə məşğul olan qurumların birgə yoxlamasına başlayacaqlar. Trend-in məlumatına görə, bu barədə çərşənbə günü jurnalistlərə Rusiya Federasiyasının Hesablama Palatasının sədri Sergey Stepaşin deyib.
"İranın Hesablama Palatasının yoxlamalara qoşulması barədə qərar var. Hazırda fəaliyyət planı hazırlanır və gələn ildən yoxlamalar başlayacaq" , - Stepaşin bildirib.
Onun sözlərinə görə, balıq ovu ilə bağlı məsələlər də nəzərdən keçirilir.
"Təəssüf ki, Xəzərdə brakonyerlik mövcuddur. Hazırda Xəzər nərə balıqlarının məhv edilməsi ilə əlaqədar ciddi problemlər yaşayır. Buna görə də biz birgə işləməklə bağlı razılığa gəlmişik", - Stepaşin deyib.
Rusiyanın Hesablama Palatasının sədri Azərbaycan Hesablama Palatasının 10 illiyinin qeyd edilməsi ilə bağlı mərasimdə iştirak edir.
