Azərbaycan, Bakı, 27 dekabr /Trend, müxbir A.Axundov/
Azərbaycanın sığorta şirkəti "Era Trans Sığorta" 2012-ci ildə ölkənin regionlarında daha 2 filial açmağı planlaşdırır. Bu barədə çərşənbə axşamı Trend-ə şirkətin idarə heyətinin sədr müavini İmran Abdullayev deyib.
"Pərakəndə biznesin inkişafı çərçivəsində artıq 8 rayonda nümayəndəliyimiz açılıb. Hazırda İcbari Sığorta Bürosuna daxil olmağımızla əlaqədar olaraq, onların işi də nəzərdən keçirilir. Bundan başqa, şimal (Quba-Xaçmaz) və şimal-qərb (Şəki-Zaqatala) zonalarında ən azı iki filialın açılması gözlənilir", - Abdullayev qeyd edib.
Onun sözlərinə görə, hazırda şirkət əsasən riteyllə işləyir, lakin korporativ müştərilər də var.
"Əgər biz büronun üzvü olacağıqsa, təbii ki, riteyli inkişaf etdirəcəyik, ancaq bununla yanaşı, korporativ müştəriləri də unutmayacağıq", - Abdullayev deyib.
1994-cü ildən fəaliyyət göstərən "Era Trans Sığorta" SŞ könüllü sığortanın 24, icbari sığortanın isə 4 növü üzrə xidmət göstərir.