Azərbaycan, Bakı, 10 fevral /Trend, müxbir N.İsmayılova/
Azərbaycan Nazirlər Kabineti "Beynəlxalq maliyyə-kredit və ictimai-siyasi təşkilatlara üzvlüklə bağlı xərclər üzrə 2012-ci ilin dövlət büdcəsində nəzərdə tutulmuş vəsaitin bölgüsü" barədə sərəncamı təsdiq edib.
Sərəncama əsasən, bu maddə üzrə ümumi xərclər 15 milyon manat təşkil edir, həmin vəsaitdən 9 milyon manat ictimai-siyasi təşkilatların, 6 milyon manat isə maliyyə-kredit isntitutlarının payına düşür.
BMT sisteminə aid olan qurumlar, proqramlar və konvensiyalar üzrə xərclər 1,496 milyon manat, İslam Əməkdaşlıq Təşkilatı üzrə 1,351 milyon manat, MDB təşkilatı üzrə 628,2 min manat, digər xərclər isə 2,769 milyon manat təşkil edir.
Sərəncma əsasən, Beynəlxalq Valyuta Fondu və Dünya Bankına üzvlük xərclərinin hər biri üzrə 70 min manat, Asiya İnkişaf Bankına 1,15 milyon manat, Avropa Yenidənqurma və İnkişaf Bankına 0,4 milyon manat, Qara dəniz Ticarət və İnkişaf Bankına 1,7 milyon manat, İslam İnkişaf Bankına 0,1 milyon manat, İqtisadi Əməkdaşlıq Təşkilatının Ticarət və İnkişaf Bankına 2,5 milyon manat, Özəl Sektorun İnkişafı üzrə İslam Korporasiyasına 10 min manat olması gözlənilir.
Azərbaycan Maliyyə Nazirliyi və Xarici İşlər Nazirliyinə bu sərəncamdan irəli gələn bütün tədbirləri həyata keçirmək tapşırılıb.
Fevralın 10-na olan rəsmi məzənnə 0,7863 AZN/USD təşkil edir.
