Azərbaycan, Bakı, 15 fevral /Trend/
Avropa Komissiyası İrandan neft idxalının qəflətən dayanması halında enerji təhlükəsizliyinin fövqəladə planlarını nəzərdən keçirmir.
"Nefti beynəlxalq bazarlarda əldə etmək mümkündür. Səudiyyə Ərəbistanı hasilatı artırmağa hazırdır. Aİ-nin üzv dövlətlərindən verilən məlumata görə, onlar digər təchizat mənbələrinə keçəcəklər", - Trend-in "İnterfaks"a istinadən verdiyi məlumata görə, bu barədə çərşənbə günü Brüsseldə keçirilən brifinqdə Avropa Komissiyasının rəsmi nümayəndəsi Marlen Holtsner bəyan edib.
O, İran televiziyasının guya Aİ-nin altı ölkəsinin artıq Avropa embarqosu səbəbindən İran nefti ilə bağlı çətinliklər hiss etməsi haqqında yaydığı məlumatla əlaqədar olaraq Aİ-nin hansı addımlar atacağı sualını belə cavablandırıb.
Digər rəsmi nümayəndə Maykl Mann həmin sualı cavablandırarkən deyib ki, İran və Aİ-nin hər hansısa ölkəsi arasında ikitərəfli xarakterli belə problemlər haqqında heç bir məlumata malik deyil. O, Aİ-nin 2012-ci ilin iyulunda İran neftinin idxalının dayandırılması haqqında qərarını xatırladıb.