Azərbaycan, Bakı, 13 aprel /Trend, müxbir Ə.Həsənov/
Almaniya bankı "Commerzbank" Azərbaycan nümayəndəliyinin filiala çevrilməsi ilə bağlı planını təxirə salıb. Bu barədə cümə günü Trend-ə "Commerzbank"ın Bakıdakı nümayəndəliyinin rəhbəri Yohan Enqbrext məlumat verib.
"Lakin bu o demək deyil ki, bankımız aktiv əməliyyatlar üçün Azərbaycanın bank bazarına çıxmağa hazırlaşmır. Bazar bu gün son dərəcə kiçikdir və "Commerzbank"ın gələcək planları ölkənin bank bazarının inkişafından asılıdır", - Enqbrext deyib.
Onun fikrincə, ölkə iqtisadiyyatında nağd hesablaşmaların böyük miqdarda olması bank sektorunun inkişafına mane olur.
"Və nə qədər ki, dövlət, o cümlədən Mərkəzi Bank bank sektoruna nağd olmayan vəsaitlərin cəlb edilməsi üzrə tədbirlər görməyib, habelə Azərbaycanın bank sisteminin bankların sayının azaldılması ilə bağlı təkrar strukturlaşması həyata keçirilməyib, "Commerzbank" öz nümayəndəliyinin filiala çevrilməsi planlarına baxmayacaq", - Enqbrext bildirib.
Hazırda "Commerzbank"ın ölkədə əsas müştəriləri banklardır. Bu səbəbdən bank öz səylərini kredit müəssisələri ilə əməkdaşlığın inkişafına, o cümlədən bank strukturlarının kreditləşdirilməsi üzrə əməliyyatlara yönəldir. Bankın əsas funksiyası Almaniya investisiyalarının Azərbaycanda (və əksinə) təşviqindən ibarətdir.
"Commerzbank" Azərbaycanın təxminən 22 aparıcı bankı ilə [ölkədə 44 bank fəaliyyət göstərir] əməkdaşlıq edir ki, onlardan hər biri beynəlxalq bazarlarda fəaliyyət göstərən müştərilərinə xidmət edir.
Qeyd edək ki, "Commerzbank AG" 2007-ci ilin noyabrında Bakıda nümayəndəliyin açılması üçün Azərbaycan Mərkəzi Bankından lisenziya alıb.
