Azərbaycan, Bakı, 9 avqust /Trend, müxbir A.Axundov/
"Moody's Investors Service" beynəlxalq reytinq agentliyi Azərbaycanın bank sisteminin iştirakçılarının sayının ciddi azalmasını gözləyir.
Azərbaycan Mərkəzi Bankının (AMB) idarə heyətinin 25 iyul 2012-ci il tarixli qərarı ilə fəaliyyətdə olan bankların məcmu kapitalı, habelə yenidən yaradılan bankların nizamnamə kapitalının minimum həcmi 10 milyondan (12,7 milyon dollar) 50 milyon manatadək (63,7 milyon dollar) artırılıb. Fəaliyyətdə olan banklar üçün bu qərar 2014-cü il yanvarın 1-dən qüvvəyə minir.
"Mövcud və yeni banklara təsir edəcək addım ölkənin bank sektoru üçün müsbət hesab edilir. Belə ki, bu, birləşməni təşviq edəcək. Bu da yekunda daha iri banklar arasında rəqabəti artıracaq", - Trend-in məlumatına görə, bu barədə cümə axşamı agentliyin saytında yerləşdirilən AMB-nin son qərarı üzrə şərhlərdə deyilir.
"Moody's" bank sisteminin kapitallaşmasının əhəmiyyətli artımını gözləmir, çünki agentlik hesab edir ki, bir çox kiçik banklar öz səhmdarları tərəfindən maliyyə ayrılmalarını təmin edə biləcəklər və bankların çoxu birləşmə və ləğvolma arasında seçim etmək məcburiyyətində qalacaqlar.
"Belə ki, bu kiçik banklar əsasən zəif institutlardır, birləşmə və ya ləğvolma Azərbaycanın bank sisteminin sabitliyini artıracaq", - agentliyin araşdırmalarında deyilir.
2011-ci ilin sonuna olan məlumata görə, hazırda fəaliyyət göstərən 43 bankdan yalnız 11 bankın yeni tələblərə uyğun kapitalı var. Bu banklar (ölkədəki bankların təqribən 25 faizi) bütün bank sektorunun 70 faizdən çox aktivlərinə sahibdir.
"Hesablamalarımıza görə, məcmu kapitalı 50 milyon manatdan aşağı olan 32 bankdan yalnız 13 orta bank (bank sisteminin 21 faiz aktivi) daxili vəsaitlər, səmdarlar tərəfindən maliyyə ayrılmaları və ya birləşmə yolu hesabına minimum tələblər səviyyəsinədək kapitallaşa bilər. Nəticədə yeni tələblər çox güman ki, bu bankların çoxunu iri banklarla rəqabət aparmaq üçün daha yaxşı maliyyə vəziyyəti olacaq güclü maliyyə institutları yaratmaq məqsədilə birləşmək barədə düşünməyə vadar edəcək", - agentlik hesab edir.
Ötən ilin sonuna olan məlumata görə, paylarına yalnız 6 faiz aktivlər düşən 19 kiçik bank isə həm öz vəsaitləri, həm də birləşmə hesabına kapitallaşma üçün lazımi vəsait tapmaqda çətinliklərlə üzləşəcəklər.
"Nəticədə əgər onlar daha iri banklar tərəfindən ələ keçirilməsə, həmin bankların ləğv olunmasını gözləyirik. Kiçik bankların ləğvi bank sistemini daha sabit edəcək, çünki onların çoxu zəif maliyyə zəmini, böyük risklərlə, bankların özləri və s. ilə sıx əlaqəli olan subyektlərin kreditləşməsinin yüksək payları ilə qeyri-şəffaf maliyyə institutlarıdır", - məlumatda deyilir.
