"Russkiy Alyuminiy" ASC Azərbaycanda ildə 300 min ton gücündə olan yeni alümin zavodunun açılması layihəsinin texniki-iqtisadi əsaslandırılmasının (TİƏ) hazırlığına başlayıb. Bu barədə Trend ə "RusAl"ın mətbuat xidmətində bildirilib.
"Qiymətləndirmənin nəticələrinə görə, zavodun inşa olunacağı yer və investisiya həcmi ilə bağlı son qərar qəbul ediləcək" -deyə şirkətdə bildirilib.
Mətbuat xidməti nümayəndəsinin sözlərinə görə, istehsalın "Azəralümin" müəssisəsinin bazasında yaradılması imkanı nəzərdən keçirilmir.
Azərbaycan baş nazirinin birinci müavini Abbas Abbasovun sözlərinə görə, zavodun işinin təmin edilməsi, infrastrukturun genişləndirilməsi və elektrik stansiyasının inşası üçün investisiyaların ümumi həcmi $1 mlrd. məbləğini ötəcək. Respublikada xammal təminatının çatışmaması nəzərə alınaraq xammal Qvineyadan tədarük olunacaq. Rusiya şirkətinin planına yeni müasir alümin və giltorpaq zavodlarının, elektrik stansiyalarının, eləcə də neft koksu, inşaat-tikinti və qablaşdırma folqa istehsalı üzrə yüksək texnoloji müəssisələrin yaradılması daxildir.
