Ötən ilin 9 ayı ərzində yerli özünüidarə orqanlarının büdcəsinə vergidən yayınma faktları ilə əlaqədar əmlak vergisi üzrə daxilolmalar 2004-cü ilin göstəriciləri ilə müqayisədə azalıb. Trend in məlumatına görə, bu barədə jurnalistlərə Vergilər Nazirliyinin Vergi siyasəti və strateji tədqiqatlar Baş idarəsinin rəisi Akif Musayev məlumat verib.
Onun sözlərinə görə, nazirlik bu gün bələdiyyələrin büdcəsinə daxilolmalar barədə dəqiq məlumata malik deyil, lakin toplanan vergilər barədə məlumatlar var.
Dünyada yerli vergilərin toplanması üzrə müxtəlif təcrübələr tətbiq edilir. Bir sıra ölkələrdə bələdiyyyələrin funksiyasına onların ərazsindən toplanan vergilərin xərclənməsi daxil olsa da, lakin bütün vergilərin toplanmasına nəzarət vergi orqanları tərəfindən həyata keçirilir. Bu zaman yerli orqanlara xərclər üçün vəsaitlər dövlət büdcəsi vasitəsilə ayrılır. Digər ölkələrdə isə, Azərbaycanda olduğu kimi yerli vergilərin yığılması və vəsaitlərin xərclənməsi ilə bələdiyyələr məşğul olur. "Bu, siyasi qərardır. Bu sistemlərdən hər birinin səmərəliliyi isə yerli özünüidarəetmə orqanlarında idarəetmə institutlarının səviyyəsindən asılıdır", - deyə A.Musayev bildirib.
Bələdiyyələr onların ərazisində fəaliyyət göstərən vergiödəyicilərin auditini keçirmək imkanlarına malik deyillər. Lakin vergilərin ödənməməsi halında borcludan verginin alınması üçün məhkəməyə müraciət edə bilərlər. Bununla yanaşı, onlar hər 3 ildən bir əmlakın qiymətləndirilməsi səlahiyyətinə malikdirlər. Bunun vasitəsilə bələdiyyələr öz ərazilərində vergiödəyicilərin potensialını müəyyən edə bilərlər.
