Avropa Komissiyası TRACECA nəqliyyat dəhlizi ilə təhlükəli yüklərin daşınması üzrə treninqlər keçirəcək şirkətin müəyyən edilməsi ilə bağlı tenderi yekunlaşdırıb. Bu barədə Trend ə təşkilatın Azərbaycandan olan milli katibi Akif Mustafayev məlumat verib. Tenderin qalibi NEA (Niderland) və HPTE (Almaniya) şirkətlər alyansıdır.
Nəqliyyat dəhlizinə texniki dəstək layihəsi çərçivəsində iki şirkət artıq müəyyən edilib. Tenderin qalibləri nəqliyyat dəhlizinin iştirakçı ölkələrinin ekspeditorları və operatorları üçün treninqlərin keçirilməsi layihəsini gerçəkləşdirəcək NEA (Niderland) və dəniz daşımaları idarələrinin işçilərinin hazırlanması layihəsini həyata keçirəcək "Knayt Smart" (Britaniya) şirkətləridir.
Hər iki şirkət texniki layihələrin hazırlanmasına başlayıb. Dəniz idarələri əməkdaşlarının hazırlanması layihəsində nəqliyyat dəhlizinin dənizə çıxışı olan 5 ölkəsi iştirak edəcək. Ekspeditorların hazırlanması layihəsi 10 ölkəni əhatə edəcək. Türkiyə, Bolqarıstan və Rumıniya bu layihədə iştirak etməyəcək. Belə ki, həmin ölkələr bu istiqamətdə kifayət qədər inkişaf etmiş xidmətlərə malikdir.
