Bu gün Asiya İnkişaf Bankının Azərbaycan üçün makroiqtisadi modellərin hazırlanması üzrə layihəsinin həyata keçirilməsinə başlandığı elan olunub. Bununla əlaqədar İqtisadi İnkişaf Nazirliyi yanında İqtisadi islahatlar mərkəzində treninqlər başlayıb. Treninqlərdə iştirak etmək üçün İqtisadi İnkişaf və Maliyyə nazirliklərinin, Azərbaycan Milli Bankının, Əhalinin sosial müdafiəsi üzrə Dövlət Fondunun, Dövlət Neft Fondunun nümayəndələri cəlb olunub. Layihə AİB-in 600 min ABŞ dolları məbləğində qrantı çərçivəsində həyata keçirilir və 2 ilə nəzərdə tutulub. AİB-in texniki yardımı çərçivəsində treninqlərin keçirilməsi üçün məsləhətçi qismində Belçikanın ECOMOD Network şirkəti və London Business University cəlb olunub.
Avqustun 16-da başlanmış makroiqtisadi modelləşdirmə üzrə treninqləri ECOMOD Network şirkətinin prezidenti Əli Bayar keçirir. Treninqlər avqustun 20-ə qədər davam edəcək. İqtisadi siyasət üzrə treninqlər sentyabrın 11-dən 15-ə qədər təşkil olunacaq və onların Bakıda keçirilməsi üçün London Business University -dən Afrika tədqiqatları üzrə Departamentin direktoru Con Uiksin başçılıq etdiyi nümayəndə heyəti Bakıya gələcək.
MDB dövlətləri arasında ECOMOD Network artıq Rusiya, Ukrayna, Qazaıxstanda makroiqtisadi modellərin yaradılması üzrə məsləhətləşmələr aparıb. Ə.Bayarın Trend ə verdiyi xəbərə görə, məsləhətçinin əsas məqsədi Azərbaycan üçün münasib olan makroiqtisadi modelin qurulmasında hökümətə yardım etməkdən ibarətdir. Onun fikrincə, ilk versiya 2006- cı ilin sonunadək işlənib hazırlanacaq. Ə.Bayar Azərbaycan iqtisadiyyatı şəraitində ölkə üçün ekonometrik modeli və elmi tarazlıq modelini təklif edir. AR hökümətinin bu gün DB (Revised Minimum Standard Model Extended) və BVF-in (Financial Planning Model) modellərindən istifadə etməsinə baxmayaraq, indiki şəraitdə yeni texnologiyaların tətbiqi tələb olunur. Həm də BVF artıq özü də öz modelindən istifadə etmir.
Ə.Bayarın təqdimatda qeyd etdiyi kimi, bir model bütün məqsədlər üçün uyğun gələ bilməz, çünki hər bir təşkilatın səciyyəvi modeli ola bilər. Ona görə də baza model və modullu texnoloji platforma yaratmaq lazımdır, bu isə ayrılmaz zəncir kimi işləməyə və iqtisadiyyatdakı bütün dəyişikliklərə (inflyasiyanın, neft qiymətlərinin artımı, vergi dərəcələrinin, məzənnənin dəyişməsi, struktur dəyişiklikləri və s.) operativ surətdə reaksiya verməyə imkan verəcək. Onun fikrincə, hökümət idarə vasitələrinin tənzimlənməsi üçün mərkəzi rolun hansı dövlət qurumuna veriləcəyini özü müəyyən etməlidir.
