Azərbaycan ICARDA-nın Quraq rayonlarda kənd təsərrüfatı tədqiqatlarının Beynəlxalq mərkəzi (International Center for Agricultural Research in the Dry Areas) hesabına maliyyələşdirilən treninqlərdə iştirak edir. Kənd Təsərrüfatı Nazirliyindən Trend ə verilən məlumata görə, tədbir noyabrın 11-dən 28-dək Kərəcədə (İran) keçirilir.
Treninqlərdə Kənd Təsərrüfatı Nazirliyinin elmi-aqrar mərkəzinin beynəlxalq münasibətlər şöbəsinin müdiri Yaqub Quliyev iştirak edir.
Treninqlər Generation Challenge Program proqramı çərçivəsində ICARDA, Wageningen Universiteti və tədqiqat mərkəzi (Niderland), İranın bitkilərin seleksiyası institutunun təşkilatçılığı ilə keçirilir və "Bitki növlərinin toxumları və genetik ehtiyatları: siyasət, saxlama və istifadə" mövzusuna həsr olunub.
1977-ci ildə təsis olunmuş ICARDA bütün dünyada yerləşən və Beynəlxalq kənd təsərrüfatı tədqiqatları üzrə Konsultativ qrup (Consultative Group on International Agricultural Research (CGIAR)) tərəfindən dəstəklənən 15 mərkəzdən biridir. Baş ofisi Aleppoda (Suriya) olan təşkilat əməkdaşlıq şəbəkəsi vasitəsilə milli, regional və beynəlxalq institutlar, universitetlər, QHT, inkişaf etməkdə olan ölkələrin nazirlikləri və sənaye ölkələrində müvəffəqiyyət qazanan tədqiqat institutları ilə işləyir.
