Azərbaycan, Bakı/ Trend müxbir İ.Xəlilova / 8 iyun 2007-ci il tarixində Moskvada Türkiyə, Azərbaycan və Rusiya iş adamlarının iştirak edəcəyi biznes forumun keşirilməsi planlaşdırılır. Bu barədə Azərbaycan-Türkiyə İş adamları Birliyindən (ATİB) xəbər veriblər.
Forum Rusiya Sənaye və Ticarət Palatasının (RSTP) binasında təşkil olunacaq. Plenar sessiyadan sonra iş adamları müxtəlif sektorlar (maliyyə, aqrosənaye və kənd təsərrüfatı, turizm, toxuculuq sənayesi, avtomobilqayırma və s.) üzrə ikitərəfli və üçtərəfli danışıqlar keçirəcəklər. Daha sonra isə forumun yekun iclası keçiriləcək və forum təşkilatçıları bəyannamə və əməkdaşlıq protokolu imzalayacaqlar.
Forumun təşkil edilməsində ATİB, ARİƏP və RSTP ilə yanaşı Türkiyənin Xarici İqtisadi Əlaqələr Şurası (DEİK) və Türkiyə Sənayeçilər Konfederasiyası (TUSKON) da iştirak edəcəklər.
ATİB-də hesab edirlər ki, forum Rusiya və Türkiyənin Azərbaycanda birgə layihə həyata keçirməsinə şərait yaradacaq. Üçüncü bir ölkədə birgə layihə həyata keçirmək barədə qərar Rusiya Federasiyasının Prezidenti Vladimir Putinin 2004-cü ilin dekabr ayında Türkiyəyə səfəri zamanı qəbul olunmuşdu. Türk iş adamları ilə görüşdə ATİB təmsilçiləri bu məsələdən hərəkət edərək Azərbaycanda Türkiyə və Rusiya tərəfindən birgə layihənin həyata keçirilə biləcəyi təklifini irəli sürüblər.
