Azərbaycan, Bakı /müx. Trend İ.Xəlilova / Azərbaycanda sığorta fondu hesabına əhalinin əmanətlərinin ümumi həcmindən 26 faiz (260 mln. manat) sığortalana bilər. Bu barədə cümə günü Milli Bankın kredit təşkilatlarının fəaliyyətinə nəzarət Departamentinin direktoru Adışirin Qasımov məlumat verib. İyulun 1-ə olan məlumata əsasən banklar tərəfindən fiziki şəxslərin 1 mlrd. manatdan çox depozitləri cəlb olunub.
Əmanətlərin sığortası qanununa əsasən, 2008-ci ilin yanvarın 1-dək 4 min manatlıq əmanətlər tam sığorta ediləcək. Yəni əmanətlərin 99,4 faizi təminatlı kateqoriyaya düşəcək.
Milli Bankın İdarə Heyəti sədrinin müavini Aftandil Babayev qeyd edib ki, 1991-ci ilə kimi açılan və indeksasiyaya düşən 2,5 mln. depozit hesablar üzrə əmanətlər nəzərə alınır. Ümumilikdə Azərbaycan banklarında 5,2 mln. depozit hesab açılıb.
Əhalinin əmanətlərinin sığorta fondu fəaliyyətə avqustun 13-dən başlayır. İlkin mərhələdə sığorta ehtiyatları 30 bankın üzvlük haqqının hesabına formalaşacaq.
