Azərbaycan, Bakı, 26 may / Trend , müxbir E.İsmayılov /
SOCAR (Azərbaycan Respublikası Dövlət Neft Şirkəti) "Azəri-Çıraq-Günəşli" dəniz neft-qaz yataqları blokunun dərinliyində yerləşən qazın hasil edilməsi üçün yatağın işlənməsi üzrə tərəfdaşlara təqdim olunan şəxsi kommersiya təkliflərinə əsasən danışıqlar aparmaq niyyətindədir. Bu barədə SOCAR-ın yüksək vəzifəli nümayəndəsi məlumat verib.
"Biz kommersiya təkliflərimizə əsasən danışıqlar aparmaq niyyətindəyik və hər hansı bir qarşılıqlı alternativ təklif gözləmirik", - deyə mənbə bildirib.
Mənbə bildirib ki, SOCAR "Azəri-Çıraq-Günəşli"də dərinlikdə yerləşən qazın işlənməsi üçün kommersiya təkliflərini tərəfdaşlarına təqdim edib və tərəfdaşlar artıq bu təklifləri nəzərdən keçiriblər. "Bizim görüşümüz baş tutub və onların [tərəfdaşların] bizim təkliflərimiz üzrə müəyyən sualları var. Biz bu sualları onlarla müzakirə etməyə hazırıq", - deyə mənbə vurğulayıb.
Mənbə bu layihənin reallaşdırılması üçün lazım olan sərmayə həcmlərini açıqlamayıb.
"Məsələ dərinlikdə yerləşən sərbəst qaz ilə bağlıdır, kifayət qədər dərin qazmalar aparılacaq", - deyə mənbə bildirib.
Mənbə bildirmişdi ki, SOCAR tərəfindən əvvəl təqdim olunan ilkin təkliflər əvvəlki müqavilələrdə qeydə alnmayan yeni yanaşmadır.
Dərinlikdə yerləşən qazın işlənməsinin hasilatın pay bölgüsü (PSA) üzrə yeni (ayrı) müqavilə çərçivəsində həyata keçirilməsi planlaşdırılır.
"Azəri-Çıraq-Günəşli" yataqlar blokunun dərinliklərində yerləşən qaz ehtiyatları 500 mlrd. kubmetr həcmində qiymətləndirilir. 1994-cü ildə Azərbaycan tərəfindən imzalanan müqaviləyə əsasən, BP və onun "Azəri-Çıraq-Günəşli" layihəsi üzrə tərəfdaşları "Fasilə" laylarınadək neft qatlarının işlənməsi hüququna malikdir. Eyni zamanda, müqavilədə qeyd olunduğu kimi, alt qatların işlənməsi ayrı sazişin mövzusudur.
Azərbaycanın digər dəniz yataqlarında analoji olaraq güman etmək olar ki, "Fasilə" layları arxasındakı qatlar məhsuldar təbəqələrdir, yəni Qırmakiüstü və Qırmakialtı laylar, həmçinin Qala karbohidrogen ehtiyatlarına malikdir. Azərbaycan geoloqlarının qiymətləndirmələrinə görə, bu qaz və kondensatdır. Bundan əlavə, vəziyyətin uğurlu olacağı təqdirdə neft qatları da aşkarlana bilər ki, bu da maye karbohidrogenə əlavə ehtiyatlar verəcək.
"AÇG" iri dəniz yataqları blokunun işlənmə layihəsi üzrə iştirakçılar bunlardır: BP (operator - 34,1367%), ChevronTexaco (10,2814%), SOCAR (10%), İNPEX (10%), Statoil (8,5633 %), ExxonMobil (8,006%), TRAO (6,75 %), Devon Energy (5,6262 %), ITOCHU (3,9205 %), Delta Hess (2,7213%). Lazımi kapital yatırımları 20 mlrd. dollar təşkil edir.
Məqalə müəllifi ilə əlaqə ünvanı: [email protected]