Azərbaycan, Bakı, 13 avqust / Trend , müxbir E. İsmayılov /
Energetika sahəsində Türkiyə ilə Rusiya arasında imzalanmış müqavilənin Azərbaycanın neft-qaz layihələrinə təsiri yoxdur. Bunu cümə axşamı ARDNŞ (Azərbaycan Respublikası Dövlət Neft Şikrəti) rəhbəri Rövnəq Abdullayev deyib.
"Türkiyə ilə Rusiya arasında müqavilə Azərbaycanın neft-qaz layihələrinə təsir göstərmir. Hətta deyərdim ki, bunun ziyandan çox xeyri var", - Abdullayev deyib.
Abdullayevin dediyi kimi, Azərbaycan öz enerji resurslarının dünya bazarına tədarükünün diversifikasiyasının tərəfdarıdır və "nə qədər çox boru kəməri olsa, Azərbaycan üçün bir o qədər faydalıdır", - Abdullayev əlavə edib.
Abdullayevin fikrincə, "Cənub axını" və "Nabukko" layihələrinin realizəsi Azərbaycanın imkanlarının daha genişləndirilməsinə imkan verəcək.
Rusiya və Türkiyə arasında qaz sahəsində əməkdaşlıq haqqında hökumətlərarası protokol avqustun əvvəlində imzalanıb. Sözügedən müqavilənin imzalanması Rusiyaya Türkiyə ərazisində "Cənub axını" layihəsi üzrə kəşfiyyat işləri aparmasına icazə verir. Protokolda həmçinin "Mavi axın -2" qaz kəmərinin inşası üzrə planlar təsdiqlənir. Türkiyə qazın Türkiyəyə tədarük olunduğu hazırkı "Mavi axın" bazasında qaz kəmərinin yaradılmasını nəzərdə tutan "Mavi axın- 2" layihəsinə maraq göstərib.
"Cənub axını"nın inşası üçün bütün icazələr növbəti il noyabr ayının 1-nə kimi alınacaq. Belə proqnozu jurnalistlərə Rusiya Baş nazirinin mətbuat katibi Dmitri Peskov bildirib. O qeyd edib ki, söhbət həmçinin Türkiyə tərəfindən verilməli icazələrdən gedir. Onun sözlərinə görə, noyabırn 1-nə kimi kəşfiyyat işlərinin aparılması üçün bütün icazələr veriləcək.
"Cənub axını" layihəsi Avropaya yeni qaz tədarükü marşrutunun yaradılmasını nəzərdə tutur. Onu İtaliyanın ENİ və Rusiyanın "Qazprom" şirkətləri həyata keçirir. Bu şirkətlər 2007 - ci il iyunun 23 - də dəniz qaz kəmərinin çəkilişi barədə saziş imzalayıblar. Rusiyanın qaz inhisarçısı "Qazprom" 2008-ci ilin ortalarında "Cənub axını" qaz kəmərinin dəqiq marşrutlarını müəyyən edib. Holdinq Bolqarıstan, Macarıstan, Serbiya və Yunanıstan ilə sazış bağlayıb, həmçinin Sloveniya və Avstriya ilə ilkin danışıqlar aparıb. "Cənub axını"nın dəniz hissəsinin Qara dənizin dibi ilə, Rusiya sahilindən ("Bereqovaya" kompressor stansiyası) Bolqarıstan sahilinədək keçəcəyi planlaşdırılır. Qaz kəmərinin Qara dəniz hissəsinin ümumi uzunluğu təxminən 900 km, maksimal dərinliyi 2000 metrdən çox olacaq. Qaz kəmərinin quru hissəsi Bolqarıstanda iki qola ayrılacaq - cənub-qərb və şimal-qərb marşrutu. Qaz kəmərinin layihə gücü təxminən 31 mlrd. kubmetr təşkil edir. Onun 63 milyard kubmetrə kimi artırılması planlaşdırılır. Qaz kəmərinin istismara verilməsi 2015-ci ilə planlaşdırılır, daha tez buraxılış istisna edilmir.
Dəyəri 7,9 mlrd. dollar avro olan "Nabukko" qaz kəməri qazın Xəzər regionundan Aİ ölkələrinə tədarükünü nəzərdə tutur. Qaz kəmərinin çəkilişi 2011 - ci ilə təyin edilib. Boru kəmərinin maksimal gücü ildə 31 mlrd. kubmetrə bərabərdir. Layihənin iştirakçıları OMV, Macarıstanın MOL, Bolqarıstanın Bulgargaz, Rumıniyanın Transgaz, Türkiyənin Botas və Almaniyanın RWE şirkətləridir. Onların hər biri bərabər paya - 16,67 faiz paya malikdir. Layihənin ümumi dəyərinin təxminən 30 faizi Nabucco Gas Pipeline International-ın səhmdarları tərəfindən ödəniləcək, qalan 70 faizi isə, kreditorların hesabına maliyyələşdiriləcək.
Məqalə müəllifi ilə əlaqə ünvanı: [email protected]
