Azərbaycan, Bakı, 5 aprel /Trend, E.İsmayılov/
Azərbaycan və Almaniya alternativ və bərpa oluna bilən enerji mənbələri sahəsində strateji tərəfdaş ola bilərlər. Bunu Azərbaycanın sənaye və energetika naziri Natiq Əliyev hesab edir.
"Ola bilsin ki, biz əməkdaşlıq edək. Azərbaycan və Almaniya alternativ və bərpa oluna bilən enerji mənbələri sahəsində strateji tərəfdaş ola bilərlər", - Əliyev Bakıda alternativ enerji mənbələrinə həsr olunmuş konfransın gedişində jurnalistlərə bildirib.
Aprelin 5-6-da keçirilən konfransın işində Ümumdünya Alternativ Enerji Şurasının rəhbəri, həmçinin alternativ enerji mənbələri üzrə ümumdünya agentliyinin yaradılmasının təşəbbüskarı olan German Şeer də iştirak edəcək.
Əliyevin sözlərinə görə, ölkədəki ümumi enerji istehsalında alternativ enerji mənbələrinin mühüm yer tutmasına görə Almaniya Avropada liderdir. Həmçinin, qeyri-ənənəvi enerji mənbələri üçün texnika və texnologiya istehsalına görə də Almaniya liderdir. Almaniya 2020-ci ilə qədər ümumi enerji istehsalında alternativ enerji mənbələrinin payını 48 faizədək çatdırmağı planlaşdırır. Avropanın əksər ölkələri isə 2010-ci ilə qədər bu göstəricini 20 faizədək çatdırmağı planlaşdırır.
Əliyevin fikrincə, Azərbaycan alternativ və bərpa oluna bilən enerji mənbələrin inkişafı yolunda ilk addımlarını atır və əgər ölkə bu göstəricini hazırkı 1 faizdən 3,5 faizədək çatdıra bilərsə, bu, əhəmiyyətli göstərici olacaq.
"Lakin hər şey bizim hansı sürətlə hərəkət edəcəyimizdən, həmin bazanı necə yaradacağımızdan asılıdır", - Əliyev vurğulayıb.
