Azərbaycan, Bakı, 6 iyul /Trend, müxbir S.Süleymanov /
Azərbaycan qazının Çinə satışı Qərbi Qazaxıstan-Qərbi Çin qaz kəmərinin inşası başa çatdıqdan sonra mümkün perspektivdir. Bu barədə Qazaxıstanın neft sahəsinin yüksəkvəzifəli nümayəndəsi bildirib.
"Hörmətli xarici ekspertlərdən birinin dediyi kimi, yaxın gələcəkdə dünyada karbohidrogenlərin iki ən iri istehlakçısı olan Avropa ilə Çin arasında Xəzərin resursları uğrunda mübarizə başlayacaq", - müsahib deyib. Onun fikrincə, hadisələrin bu cür inkişafı Qazaxıstan-Çin qaz kəmərinin ikinci növbəsinin inşası başa çatdıqdan sonra reallığa daha yaxın olacaq.
"Bu layihənin həyata keçirilməsi başa çatdıqdan sonra Çinin Xəzərə, nəticə etbarilə də onun resurslarına daha da yaxınlaşacağı faktını inkar etmək olmaz", - mənbə bildirib.
İlk dəfə Xəzərdən, o cümlədən Azərbaycandan qaz axınlarının Çinə yönəldilə bilməsi haqqında ideya 2009-cu ilin payızında səslənib. Azərbaycan qazının Qazaxıstan ərazisindən keçəcək Çin qaz kəmərinə yönəldilməsi təklifi ilə "QazMunayQaz" Milli Şirkətinin prezidenti Kairgeldi Kabıldin çıxış edib.
"QazMunayQaz" "Atasu-Alaşankou" neft kəmərini, eləcə də rəsmi sənədlərdə Asiya adlandırılan qaz kəmərini özündə birləşdirərək "Qazaxıstan-Çin" sistemini yaradır. Bu il Qazaxıstan "Beyneu-Bozoy-Şimkent" adlı daha bir qaz kəmərinin tikintisinə başlamaq niyyətindədir. Bu kəmər Qazaxıstan qazının qərb yataqlarından indiyədək Özbəkistandan qaz idxalından asılı olan cənuba çatdırılmasını təmin edəcək. Onun tikintisi 2011-ci ildə başa çatacaq. Asiya qaz kəmərinin "Beyneu-Bozoy-Şimkent" kəməri ilə sinxronlaşdırılması nəticəsində qazax qazının onunla Çinədək çatdırılması mümkündür.
Hər iki qaz layihəsi "QazMunayQaz" və onların reallaşdırılması üçün vəsait ayıran CNPC şirkətinin birgə iştirakı ilə həyata keçirilir.
