Azərbaycan, Bakı, 25 avqust /Trend/
Bu günlərdə "Azərikimya" İB-nin Mexaniki-Təmir Zavodu ilk dəfə olaraq, ekoloji əhəmiyyətli sutəmizləyici qurğu hazırlayıb. Bu barədə ARDNŞ-in yaydığı məlumatda deyilir.
Ekologiyanın, ilk növbədə, dəniz və çayların, həmçinin, ətraf mühitin saflığının qorunması məqsədi daşıyan və yaşayış massivlərində, müəssisələrdə, eləcə də fərdi yaşayış sahələrində quraşdırılması nəzərdə tutulan qurğu Çexiyanın "TOPALvater" şirkətinin layihəsi əsasında hazırlanıb. Avqustun 24-də sutəmizləyici qurğunun ilk nümunəsi əsas sifarişçiyə - "Azneft" İstehsalat Birliyinə yola salınıb. Artıq ikinci sutəmizləyici "Topas-75" qurğusu da istehlakçıya göndərilməsi üçün hazır vəziyyətə gətirilib. Hazırda üçüncü qurğunun üzərində tamamlama işləri həyata keçirilir.
Qabariti o qədər də böyük olmayan, istənilən yerdə və səviyyədə quraşdırılması mümkün olan sutəmizləyici qurğuların detallarının müəyyən hissəsinin yaxın zamanlarda Mexaniki-Təmir Zavodunda hazırlanması planlaşdırılır.
