Azərbaycan, Bakı, 31 avqust /Trend, müxbir E.İsmayılov/
Bazarında alternativ neft ixracına ehtiyacı olan Belarusla neft satışı sahəsində əməkdaşlıq "Sarmatiya" beynəlxalq boru kəməri müəssisəsi (BBK) üçün maraqlıdır. Bu barədə Trend-ə BBK-nın baş direktoru Sergey Skripka telefonla deyib.
"Bu ölkə ilə əməkdaşlıq variantları çox maraqlıdır. Orada alternativ neft ixracına ehtiyac duyan real istehlakçıların olduğunu hələ demirik. Bundan başqa, onlar Venesueladan ixrac şəklində qismən özləri üçün bu neft resursunu artıq tapıblar. Bildiyimə görə, Azərbaycan tərəfi ilə bununla bağlı danışıqlar aparılır", - Skripka deyib.
Onun sözlərinə görə, bu gün Belarusa neft ixracı dəmir yolu ilə Ukraynadan və ikinci variant Litvadan təşkil olunub.
"Əlbəttə, neft həcmləri kiçik olduğu birinci mərhələ üçün onları dəmir yolu vasitəsilə həyata keçirmək olar. Belarus tərəfinin vəd etdiyi kimi, əgər həcmlər artarsa, hesab edirəm, Ukrayna tərəfi neftin boru kəməri ilə ixracı məsələsinə baxacaq və onda bizim də bu məsələyə qoşulacağımıza ümid edirik", - Skripka qeyd edib.
Bundan əvvəl Belarus Respublikasının enerji potensialının inkişaf strategiyasında deyildiyi kimi, ölkə Azərbaycandan, Venesueladan və Fars körfəzi ölkələrindən Baltik və Qara dənizdəki limanlar vasitəsilə neft alınması imkanlarını araşdırıb. Göstərilən mənbələrdən iqtisadi baxımdan sərfəli olan neft tədarükünün təşkilinin qiymətləndirilməsi aparılıb. Bu zaman limana qədər neft fraxtının təqribi dəyəri, sonradan Belarus NEZ-lərinə daşınmaq üçün neftin tankerlərdən dəmiryol çənlərinə boşaldılması üzrə limanların imkanları, neftin dəmir yolu ilə daşınmasının qiyməti, eləcə də boru kəməri nəqliyyatından istifadə imkanları öyrənilib. İqtisadi baxımdan dəniz nəqliyyatı ilə neftin qəbulunun təşkili Odessa və Cənub (Ukrayna), Ventspils (Latviya), Klaypeda (Litva), Tallin (Estoniya) limanlarından sərfəlidir.
Strategiyada deyildiyi kimi, revers rejimdə Polotsk-Ventspils və avers rejimdə Odessa-Brodı boru kəmərlərindən istifadə etməklə, Belarus limanlarından neft satışının təşkili kimi, prioritet istiqamətlərdən biri üzrə regionların və neft tədarükçülərinin şaxələndirilməsi məsələlərinin araşdırılması bundan sonra da davam etdiriləcək.
Odessa-Brodı-Plotsk-Qdansk neft kəməri marşrutunda Azərbaycana əsas tədarükçü rolu ayrılıb. Lakin Azərbaycan tranzit ölkə kimi də işləyə bilər. Azərbaycan bu boru kəməri ilə təkcə öz neftini deyil, həm də Mərkəzi Asiya neftini ixrac edə bilər.
Odessa-Brodı neft nəqli layihəsi Ukraynanın NEZ-lərinə neft ixracının şaxələndirilməsi və ölkənin tranzit imkanlarının inkişafı üçün planlaşdırılıb. Odessa-Brodı neft kəmərinin tikintisi 2002-ci ilin mayında başa çatıb. Magistralın uzunluğu 674 km, boruların diametri 1 020 millimetrdir. Neft kəməri və terminalının gücü ildə 9-14 milyon ton təşkil edir.