Azərbaycan, Bakı, 29 noyabr /Trend/
ARDNŞ və Azərbaycanda böyük enerji layihələrinin iştirakçısı olan Böyük Britaniyanın BP şirkəti səmt qazının yandırılması və atmosferə atılmasının azaldılması üzrə işçi qrupunun yaradılması barədə razılığa gəliblər. Bu barədə bazar ertəsi ARDNŞ-nin Ekologiya İdarəsinin saytında yerləşdirilən məlumatda deyilir.
Məlumata əsasən, bu qərar ARDNŞ-nin ekologiya üzrə vitse-prezidenti Soltan Əliyev ilə BP-nin mühəndislik işləri üzrə vitse-prezidenti Maykl Barns arasında görüş zamanı qəbul edilib.
Görüşdə tərəflər BP və ARDNŞ-nin mütəxəssislərindən ibarət olacaq işçi qrupu tərəfindən texniki problemlərin birgə araşdırılması, məlumat mübadiləsi, atılmanın azaldılması istiqamətində məqsədlər müəyyən ediblər.