Azərbaycan, Bakı, 11 yanvar /Trend, müxbir E.İsmayılov/
Amec-Tekfen-Azfen (ATA) alyansı "Chirag oil project" ("Azəri-Çıraq-Günəşli" yataqlar blokunda neft hasilatının artırılması) çərçivəsində platformalar üçün yuxarı tikililərin (topside) və qazma obyektlərinin inşası üzrə işləri 2012-ci ilin ortalarınadək başa çatdıracaq. Bu barədə çərşənbə axşamı neft-qaz sektorundakı mənbə məlumat verib.
Onun sözlərinə görə, bu ilin martında ATA platformaların yuxarı tikililərin və qazma qurğularının xırda elementlərinin montajı üzrə işlərə başlayacaq.
"Hazırda həm yuxarı tikililərin, həm də qazma qurğularının tikintisi üzrə işlər aparılır. Bu layihə çərçivəsində işlər tam olaraq 2012-ci ilin ortalarında başa çatacaq", - mənbə bildirib.
Bir müddət əvvəl mənbənin bildirdiyinə görə, platformalar üçüm yuxarı tukililərin, eləcə də qazma obyektlərinin tikintisi prosesi 2 il yarım vaxt aparacaq. Tikinti prosesi iki mərhələdən ibarət olacaq. Birinci mərhələ vacib elementlərin istehsalı, ikincisi isə onların montajıdır. Zəruri elementlər mərhələli şəkildə hazırlanacaq, bundan sonra isə onların tədricən montajı həyata keçiriləcək.
ATA artıq "Azəri-Çıraq-Günəşli" yataqlar blokunun işlənməsi layihəsi çərçivəsində texniki platformalardan birinin yuxarı tikilisinin qurulması ilə məşğul olub.
"Chirag oil project" dənizin 170 metr dərinliyində qurulacaq yeni platformada "Qərbi Çırağ"ın tikintisini nəzərdə tutur.
"Chirag oil project" çərçivəsində tikinti işlərinin əksəriyyəti, o cümlədən əvvəlki layihələr üçün xaricdə tikilən platformanın buruq modulunun tikintisi Azərbaycanda həyata keçiriləcək.
"Chirag oil project" altı milyard dollar həcmində investisiyanı nəzərdə tutur.
AÇG-də neft hasilatının artırılması çərçivəsində tikiləcək yeni platformadan Azeri Light növlü neft hasilatının planlaşdırılan sutkalıq həcmi 183 min barel təşkil edəcək. Yeni platformadan səmt qazının gözlənilən sutkalıq həcmi 6,5 milyon kubmetri ötəcək.
Layihə çərçivəsində qabaqlayıcı qazma 2010-cu ilin birinci və 2012-ci ilin ikinci yarısını əhatə edəcək. Bu dövrdə qabaqlayıcı qazmanı "Dədə Qorqud" qurğusu aparacaq. Platformadan hasilata 2013-cü ilin sonunda başlamaq planlaşdırılıb.
Layihənin reallaşdırılması çərçivəsində 300 milyon barel neft hasilatı planlaşdırılır.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoil" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).
