Azərbaycan, Bakı, 7 iyun /Trend, müxbir E.İsmayılov/
"SOCAR-Turcas" şirkətinin şəriki olduğu "Petkim" neft-kimya kompleksinin gücü 2020-ci ilədək hazırkı 3,2 milyon tondan 6-6,5 milyon tonadək artacaq. Trend-in məlumatına görə, bu barədə çərşənbə axşamı Bakıda "Petkim Petrokimya Holdinq"in baş direktoru Həyati Öztürk bildirib.
"Nəzərdə tutulan işlər çərçivəsində 2015-ci ilədək kompleksi xammalla təmin edəcək neft emalı zavodunun tikintisi, habelə neft-kimya kompleksinin özünün müəssisələrinin modernləşdirilməsi və genişləndirilməsi işləri başa çatacaq", - Öztürk deyib.
Onun sözlərinə görə, dörd il ərzində rezervuar parkının daxil olduğu liman kompleksinin, eləcə də gücü 1,2 milyon TEU olan konteyner terminalının tikintisi başa çatacaq.
2015-ci ilədək görülməsi nəzərdə tutulan işlərin yerinə yetirilməsi üçün tələb olunan investisiyaların həcmi altı milyard dollar təşkil edəcək ki, bunun 300 milyon dollardan coxu kompleksin özü tərəfindən, yerdə qalan hissəsi isə SOCAR-Turkqaz tərəfindən yatırılacaq.
Baş direktorun sözlərinə görə, kompleksə investisiyalar istehsal müəssisələrinin modernləşdirilməsi və genişləndirilməsi üçün nəzərdə tutulub. Genişləndirmə üzrə nəzərdə tutulan işlər nəticəsində 2015-ci ilədək kompleksin gücü 15-20 faiz artacaq.
Habelə, mövcud müəssisələrin modernləşdirilməsi və üç kiçik fabrikin tikintisi də planlaşdırılıb. Öztürkün sözlərinə görə, gələn ildən gücü 25 meqavat olan külək parkının yaradılması üzrə işlər başa çatacaq.
O bildirib ki, 2020-ci ilədək gücü bir milyon tona yaxın olan yeni etilen istehsalı fabrikinin tikintisi də planlaşdırılır.
Hazırda kompleksdə etilen istehsalı 500 min tondan azacıq çoxdur və onun 600 min tonadək artırılması planlaşdırılır.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün elan edilən tenderin qalibi olub. Buna görə alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın "Petkim"in inkişafına yatıracağı sərmayələr məhsul idxalını 30 faizədək azaltmağa imkan verəcək.
"Petkim Petrokimya Holdinq" plastik qablaşdırmalar, parçalar, PVC, yuyucu vasitələr istehsal edir və Türkiyədə bu məhsulların yeganə istehsalçısıdır. Şirkət məhsullarının ¼-ni ixrac edir.
