Azərbaycan, Bakı, 16 dekabr /Trend, müxbir E.İsmayılov/
Azərbaycanın "Şahdəniz" qaz-kondensat yatağının işlənməsi layihəsinin ikinci mərhələsinin həyata keçirilməsi Azərbaycan qazının Avropaya çıxışını təmin edəcək. Trend-in məlumatına görə, bunu jurnalistlərə energetika naziri Natiq Əliyev deyib.
Onun sözlərinə görə, bu da öz növbəsində Gürcüstan, Türkiyə, Albaniya, Yunanıstan və İtaliya üçün ölkənin əhəmiyyətini artıracaq.
N.Əliyev qeyd edib ki, "Şahdəniz"in ikinci mərhələsinin reallaşdırılması, eyni zamanda, gələcəkdə Azərbaycanın "Abşeron", "Ümid", "Babək", "Naxçıvan" və digər yataq və perspektiv strukturlarından Avropanın qaz bazarlarına çıxış üçün imkan yaradacaq.
"Şahdəniz-2" layihəsinin əhəmiyyətindən danışan nazir vurğulayıb ki, bu layihənin reallaşdırılması yeni infrastrukturun yaradılmasını, yeni texnologiyaların tətbiqini, yeni iş yerlərinin açılmasını nəzərdə tutur: "Bu da öz növbəsində, perspektivdə ölkənin daha işıqlı gələcəyini təmin edəcək".
