Azərbaycan, Bakı, 13 may /Trend, müxbir E.İsmayılov/
Azərbaycan Respublikası Dövlət Neft Şirkətinin (ARDNŞ) Türkiyədə yeni neft emalı zavodunun (NEZ) tikintisi layihəsi çərçivəsində kredit sazişlərinin imzalanması mayın sonunda İstanbulda baş tutacaq. Bunu çərşənbə axşamı jurnalistlərə ARDNŞ prezidenti Rövnəq Abdullayev deyib.
Onun sözlərinə görə, mayın sonunda, həmçinin Londonda idxal-ixrac bankları ilə kredit sazişlərinin imzalanması planlaşdırılır.
R.Abdullayev qeyd edib ki, sazişlər hələ imzalanmayıb, lakin bütün məsələlər artıq razılaşdırılıb.
Qeyd edək ki, ARDNŞ bir müddət əvvəl "Star" NEZ-in tikintisi çərçivəsində maliyyə institutları ilə 3,5 milyard dollar dəyərində kredit sazişi imzalamışdı.
