Azərbaycan, Bakı, 30 sentyabr /Trend, müxbir Emil İsmayılov/
Azərbaycan Respublikası Dövlət Neft Şirkəti (ARDNŞ) Ukraynada fəaliyyətini başlanğıcda müəyyən edilmiş strategiyaya uyğun həyata keçirir. Bunu çərşənbə axşamı Trend-ə ARDNŞ-dəki mənbə Ukraynadakı mürəkkəb ictimai-siyasi vəziyyətin Dövlət Neft Şirkətinin bu ölkədə fəaliyyətinə mümkün təsiri haqqında sualı cavablandırarkən deyib.
Onun sözlərinə görə, bütün şirkətlərin işinə təsir etmiş Ukraynadakı mürəkkəb vəziyyətə baxmayaraq, ARDNŞ bu ölkədə strategiya ilə müəyyən edilmiş plana uyğun işləyir: "Bu, digər şirkətlərlə müqayisədə ARDNŞ-yə fəaliyyətində Ukraynadakı ümumi vəziyyətin təsirini daha az hiss etmək imkanı verir".
Agentliyin həmsöhbəti qeyd edib ki, Ukraynada avtomobil yanacaqdoldurma məntəqələri (YDM) şəbəkəsinə malik ARDNŞ indiki şəraitdə bu ölkədə yeni YDM-lərin tikintisi üzrə işləri davam etdirir: "Hazırda Ukraynada SOCAR brendi altında fəaliyyət göstərən YDM-lərin ümumi sayı təqribən 40 ədəddir".
Onun sözlərinə əsasən, hazırda Ukraynada tikilən yeni YDM-lərin istismara verilməsinin dəqiq tarixini hələ söyləmək çətindir.
Qeyd edək ki, Belarus, Polşa və digər ölkələrdən alınmış yanacaq ARDNŞ-nin Ukraynadakı YDM-lərində reallaşdırılır.
