Hazırda "Şahdəniz" yatağından əlavə qaz tədarükü üzrə Azərbaycan və Gürcüstan arasındakı danışıqların tamamlanması barədə danışmaq hələ tezdir", - deyə Azərbaycan-Gürcüstan danışıqlarına yaxın mənbədən Trend ə bildiriblər.
"Bu il "Şahdəniz" yatağında qaz hasilatının məhz nə vaxt başlanacağı və Türkiyənin texniki hazırlığından asılı olaraq, bu ölkəyə nə qədər qaz hasil olunacağı hələ sona qədər aydın deyil", - deyə mənbədən bildiriblər.
Ötən həftə Gürcüstanın energetika naziri Nika Qilauri qeyd edib ki, Gürcüstan 2007-ci ildən etibarən "Şahdəniz"dən 1,2 milyard m3 qaz alacaq. Onun sözlərinə görə, Bakı-Tbilisi-Ceyhan neft kəmərinin Ceyhan limanında istismara verilməsi zamanı bu barədə razılıq əldə olunub. Azərbaycanın 1 min m3 qazının qiyməti maksimum 110 ABŞ dolları olacaq, hazırda Gürcüstan Rusiyaya da bu qədər ödəyir. İstisna edilmir ki, 2007-ci ildən etibarən Rusiya 1 min m3 qaza görə Gürcüstandan 170 ABŞ dolları tələb edəcək.
Mənbənin sözlərinə görə, hazırda qazın geriyə - "Azəri-Çıraq-Günəşli" yatağına vurulma məsələsi də açıq qalıb. "Azərbaycan nə qədər qazın laya vurulacağını, nə qədər qazın ABƏŞ tərəfindən Dövlət Neft Şirkətinə veriləcəyini bilməlidir. Bundan asılı olaraq, qaz balansı aydın olacaq və "Şahdəniz" yatağından əlavə qaza olan ehtiyac müəyyənləşdiriləcək", - deyə mənbə qeyd edib.
