Azərbaycan, Bakı, 1 mart /Trend, müxbir H. Vəliyev/
Azərbaycan və Hindistan "ASAN imza" mobil imzanın ikitərəfli tanınması haqqında memorandum imzalayacaqlar. Bu barədə şənbə günü Trend-ə Vergilər Nazirliyindən bildiriblər.
Elektron imzanın beynəlxalq aləmdə tanınması ölkələrin dövlət və özəl təşkilatları arasında sənədlərin imzalanması zamanı onun hüquqi əhəmiyyətinə zəmanət verir.
Hazırda mobil imzanın ikitərəfli tanınması məsələsi üzrə sənəd Estoniya ilə imzalanıb. Nazirlikdən qeyd ediblər ki, Fransa, Belçika, Mərakeş, Gürcüstan və digər ölkələrin iri şirkət və təşkilat nümayəndələri Azərbaycanın mobil rəqəmsal imzanın tətbiqi sahəsində təcrübəsinə maraq göstərirlər.
Hazırda "ASAN imza"dan "Bakcell" MMC və "Azercell" MMC şəbəkələrində istifadə etmək mümkündür.
Operator şəbəkələrində "ASAN imza"dan istifadə üzrə tariflər aşağıdakı kimi bölüşdürülüb: Vətəndaşlar üçün 3 illik istifadə qiyməti - 30 AZN, dövlət qulluqçuları üçün 80 AZN, sahibkarlıq fəaliyyəti ilə məşğul olan hüquqi və fiziki şəxslər üçün isə 154 AZN təşkil edir.
Xidmətdən aylıq istifadə haqqı əhali və dövlət qulluqçuları üçün 0.50 AZN, sahibkarlıq fəaliyyəti ilə məşğul olan hüquqi və fiziki şəxslər üçün isə 1 AZN təşkil edir.
Vergilər Nazirliyinin qərarı əsasında yaradılmış "ASAN" Sertifikat Xidmətləri Mərkəzi (ASXM) - autentifikasiya və "ASAN imza" mobil elektron imza sertifikatlarını təqdim edir və dövlət strukturları, özəl sektor və vətəndaşlar tərəfindən sertifikatların və elektron imzaların istifadəsini təmin edən digər xidmətləri həyata keçirir.
Asan İmza (Mobil imza) - Vergilər Nazirliyi, ASAN xidmət mərkəzləri və Mobil operator tərəfindən verilən və elektron xidmət istifadəçisinin autentifikasiyasını, sənədin elektron imzalanmasını və imzalayan şəxsin şəxsiyyətinin müəyyən edilməsini (identifikasiyasını) təmin edən xidmətdir. Asan İmza (Mobil imza) bütün mövcud e-xidmətlərdən istifadəni mümkün edir.
Azərbaycanda mobil elektron imzanın tətbiqinə 2013-cü ilin mayında başlanıb.
