Azərbaycanın Rabitə və İnformasiya Texnologiyaları Nazirliyində İT üzrə Azərbaycan Beynəlxalq Universitetinin texniki təhsil platformasının yaradılması və mütəxəssislərin hazırlanmasının əsasları üzrə kompleks tədbirlər planının işlənməsi və yerinə yetirilməsinə həsr olunmuş konfrans keçirilib. Nazirliyin informasiya mərkəzindən Trend ə verilən məlumata görə, rabitə nazirinin müavini İltimas Məmmədov bildirib ki, nazir Əli Abbasovun sərəncamına əsasən, universitetin yaradılması üzrə təşkilat komitəsi təsis olunub, bu komitənin tərkibi və məqsədləri müəyyən edilib. O vurğulayıb ki, Təhsil Nazirliyi kadrların hazırlanmasının lisenziyalaşdırılması və metodiki attestasiyası ilə bağlı işlər aparacaq, hazırda bir sıra qeyri-hökumət və biznes təşkilatları ilə əlaqələrin qurulması istiqamətində işlər həyata keçirilir.
Təhsil nazirinin müavini Elmar Qasımov vurğulayıb ki, bu istiqamətdə əsas məqsəd maddi-texniki bazanın yaradılmasından ibarətdir. Onun fikrincə, təhsil müəssisəsinin Qafqaz universiteti kimi şəhər kənarında tikilməsi məqsədəuyğun olardı. Universitetə müəllimlərin cəlb olunmasına gəlincə, E.Qasımov qeyd edib ki, yerli potensialdan və xaricdə təhsil almış gənc mütəxəssislərdən istifadə etmək mümkündür.
Nazir müavini hesab edir ki, universitet məzunlarının iş yerləri ilə problemləri olmayacaq. "Hər il ali təhsil müəssisələrinə İT ixtisasları üzrə 550 nəfər daxil olur. Gələcəkdə bu ixtisasları yeni yaradılacaq İT üzrə Azərbaycan Beynəlxalq universitetinə köçürmək olar", - deyə E.Qasımov bildirib.
