Azərbaycan-Amerika BM Catel Bakı, Sumqayıt, Novxanı, Nabran, Əlibayramlıda mobil rabitə xidməti göstərməyə başlayıb. Bu barədə Trend ə Rabitə və İnformasiya Texnologiyları Nazirliyinin Maliyyə və iqtisadi analiz departamentinin başçısı Rəşad Nəbiyev xəbər verib.
Onun sözlərinə görə, BM fəaliyyətini CDMA texnologiyası əsasında həyata keçirir. Catel ilin sonunadək infrastrukturun yaradılmasına ən azı 100 milyon ABŞ dolları məbləğində sərmayə qoymağı öhdəsinə götürmüşdü.
Ötən ilin sonunda Rabitə nazirliyindən lisenziya alan ikinci mobil rabitə operatoru Azerfon BM də (GSM operatoru) analoji həcmdə vəsait qoyub. Onun təsisçiləri Aztelekom İB (10%), Almaniyanın Siemens şirkəti (30%) və Böyük Britaniyanın iki şirkətidir. R.Nəbiyevin qeyd etdiyi kimi, Azerfon 2006-cı ilin sentyabr ayından fəaliyyətə başlayacaq.
Onun sözlərinə görə, bu iki operator öz biznes-planlarında kifayət qədər aşağı qiymətlər təşkil edəcəklər və bu, mövcud Azərsell və Baksell operatorları ilə rəqabət üçün mobil rabitə bazarına daxil olmağa imkan verəcək.
Yeni şirkətin telefon indeksi məsələsinə gəlincə isə, R.Nəbiyev qeyd edib ki, Catel 040 indeksi ilə fəaliyyət göstərir, Azərphone operatorunun isə 060 indeksi ilə işləyəcəyi gözlənilir.
Şirkətlər kollegiyanın 28 dekabr 2005-ci il tarixli qərarına əsasən Rabitə və İnformasiya Texnologiyaları Nazirliyinin lisenziyasını alıblar.
Layihənin başlıca tələbi isə 2 il ərzində Azərbaycan ərazisinin 85%-ni mobil rabitə ilə təmin etməkdən ibarətdir.