Azərbaycanda 3-cü mobil operator sayılan "Azərfon" fəaliyyətə başlaması ilə bağlı Rabitə və İnformasiya Texnalogiyaları Nazirliyindən müəyyən qədər vaxt istəyib. Trend xəbər verir ki, bu barədə jurnalistlərə rabitə və informasiya texnologiyaları nazirinin müavini İltimas Məmmədov bildirib.
Nazir müavini onu da qeyd edib ki, sözügedən operator oktyabr ayında fəaliyyətə başlayacağını bildirsə də sonradan məlum səbəblərdən bu qeyri-müəyyən vaxta qədər təxirə salınıb: "Nazirlik də bununla razılaşdı ki, lazım olan keyfiyyəti qorumaq və qalan şərtləri yerinə yetirməklə müəyyən qədər gecikməyə yol vermək olar"-deyə o qeyd edib.
İ.Məmmədov 3-cü mobil operatorun Azərbaycana gəlişiylə bu sahədə danışıq qiymətlərinin aşağı düşməsi ilə bağlı verilən proqnozlara da münasibətini bildirib və qeyd edib ki, nazirlik belə bir proqnozlaşma aparmır. Bunu operatorlar özləri proqnozlaşdırır.
