Azərbaycan, Bakı /müx. Trend S.Babayeva/ Azərbaycanda regional innovasiya zonalarının yaradılmasını nəzərdə tutan layihə Rabitə sahəsində Regional Birlik (RRB) üzvlərinə təqdim olunacaq. Bu barədə çərşənbə axşamı Azərbaycanın Rabitə və İnformasiya Texnologiyaları Nazirliyindən məlumat veriblər. Layihənin təqdimatı rabitə və informasiya texnologiyaları naziri Əli Abbasovun rəhbərlik etdiyi nümayəndə heyətinin mayın 27-30-da Latviyaya planlaşdırılan səfəri çərçivəsində keçiriləcək. Qeyd edək ki, həmin tarixdə burada RRB rabitə administrasiyaları rəhbərləri Şurasının 37-ci iclası keçiriləcək.
Təqdimat RRB-in İcraiyyə Komitəsinin təşəbbüsü ilə gerçəkləşdiriləcək.
Artıq layihə ilə bağlı ilkin təkliflər məsləhətçi qismində çıxış edən Booz Allen Hamilton tərəfindən hazırlanıb. Bu təkliflər özündə vergi və gömrük qanunvericiliynə dəyişiklikləri əks etdirir. Məqsəd layihənin reallaşmasına xarici investorları cəlb etməkdir.
Məlumat üçün bildirək ki, regional innovasiya zonasının yaradılması layihəsi kiçik və orta innovasiya sahibkarlığının inkişafı üçün texnoparkların, elektron avadanlıq və proqram məhsullarının istehsalı və inkişafı üçün regional bazanın yaradılmasını, habelə ölkənin tranzit informasiya mərkəzinə (Data Centre) çevrilməsini nəzərdə tutur.