Azərbaycan, Bakı, 23 iyun / Trend , müxbir S.İlhamqızı, G.Əhmədova/ Avropa Birliyində hesab edirlər ki, Türkiyə AB-yə daxil olmaq üçün lazımi islahatlarını davam etdirsə, bu ilin ikinci yarısında irəliləyişlər ildə edə bilər. "Əgər Türkiyə lazımi islahatları həyata keçirsə, irəliləyişlər 2008-ci ilin ikinci yarısında da davam edəcək" - deyə Avropa Birliyinin Genişlənmə üzrə Komissiyasının sözçüsü Kristina Nagi Trend -a bildirib.
Türkiyə 1987-ci ildən Avropa Birliyinə daxil olmağa çalışır. Avropa Birliyinin daimi Nümayəndələr Komitəsi Türkiyə ilə "şirkətlər hüququ" və "əqli mülkiyyət hüququ" fəsillərinin müzakirəsinə razılıq verib. İyunun 17-də Türkiyənin xarici işlər naziri Əli Babacanın, AB-nin fəaliyyətdə olan sədri Dmitri Rupel və AB Genişlənmə Komissiyasının sədri Maykl Leygin (Michael Leigh) iştirakı ilə keçirilən beşinci hökumətlərarası konfransda həmin fəsillər müzakirə edilib.
AB nümayəndəsi bildirib ki, Türkiyənin Birliyə daxil olması prosesi normal templə gedir. "Avropa Birilyinə daxil olma prosesi uzun və islahatlar tələb edən bir prosesdir. Bu proses həm də Avropa Birilyinə daxil olmağa can atan hər bir ölkə üçün böyük bir çağırışdır. Türkiyə ilə iyunda danışıqların davam etdirilməsi üçün iki yeni fəsil açılıb" - deyə AB rəsmisi bazar ertəsi elektron poçtla bildirib.
Onun sözlərinə görə, ötən illər ərzində Türkiyə AB-yə tamhüquqlu üzv olmaq üçün islahatlar həyata keçirib. Onların sırasında ölüm hökmünün ləğvi, silahlı qüvvələrə mülki nəzarətin gücləndirilməsi və Konstitusiyaya bir sıra dəyişikliklər edilməsi kimi islahatlar var idi - deyən Nagi əlavə edib ki, bu tədbirlər Türkiyədə demokratik azadlıqları və insan hüqüqlarının müdafiəsini daha da gücləndirdi.
AB təmsilçisinin sözlərinə görə, Türkiyə islahatlar sırasında qadınların və uşaqların hüqüqlarının qorunması sahələrində də nailiyyətlər əldə edib. Lakin onun fikrincə, bu islahatlar və işgəncələrə və zorakılığa qarşı mübarizə dözümsüzlük siyasəti ilə həyata keçirilib.
"Sonra Türkiyə ifadə azadlığı ilə bağlı öz qanunvericiliyinə dəyişiklik etdi, qeyri-müsəlman dini azlıqların mülkiyyət hüququnun artırılması üçün "Fondlar haqqında qanun" da qəbul etdi" - deyə Nagi bildirib.
Lakin AB nümayəndəsi hesab edir ki, Türkiyə hələ çox işlər görməli, Avropa Birliyinin üzvü olmaq üçün əsas insan hüquq və azadlıqların müdafiəsini AB standartlarına uyğun şəkildə gücləndirilməlidir. Ekspertə görə, Türkiyə öz iqtisadiyyatını da inkişaf etdirməlidir ki, Avropa Birliyinin daxili bazarında güclü rəqabətlərə tab gətirə bilsin.
"Və sonda, Türkiyə nümayiş etdirməlidir ki, AB-nin, istər ətraf mühit, istər baytarlıq standartları və ya ərzaq məhsullarının təhlükəsizliyi kimi üzvlük öhdəliklərini hər bir sahədə yerinə yetirməyə qadirdir. Bu isə, AB-nin 80 000 səhifəlik qanun və standartlarının qəbul edilməsi və yerinə yetirilməsi deməkdir" - deyə AB rəsmisi bildirib.
İyulun 1-dən Avropa Birliyində sədrlik rotasiya qaydası ilə Fransaya keçir. İyunun 20-də Fransa prezidenti Nikola Sarkozi beyan edib ki, "Lissabon razılaşması" qüvvəyə minməyincə AB-yə kiminsə daxil olmasından söhbət belə gedə bilməz.
Fransa prezidentinin bu bəyanatı 2015-dən sonra Avropa blokuna daxil olmağa ümid bəsləyən Türkiyə üçün güclü siqnal kimi qiymətləndirilir.
Avropa Birliyinin idarəetmə sistemində islahatlar aparlımasını nəzərdə tutan "Lissabon razılaşması" 2007-ci ilin 13 dekabrında imzalanıb.
1951-ci ildə Belçika, Almaniya, Fransa, Hollandiya, Lüksemburq və İtaliya tərəfindən yaradılan AB - yə hazırda 27 ölkə daxildir. Təşkilatın mərkəzi qərargahı Brüsseldə yerləşir. AB-də ən əhatəli genişlənmə 2004-cü il mayın 1-də baş verib, 10 yeni ölkənin üzv olması ilə, cəmi 378 milyon əhalisi olan Birliyin əhalisinin sayı 454 milyona, rəsmi dillərinin sayı 11- dən 20-yə çatdı.
Sülhü qorumaq, iqtisadi və sosial inkişafı təmin etmək məqsədilə yaradılmış AB üç ittifaqdan ibarətdir.
Məqalə müəllifi ilə əlaqə saxlamaq üçün elektron ünvan [email protected]
