İran Futbol Federasiyası ABŞ-la iki yoldaşlıq görüşünün keçirilməsi ilə bağlı qarşı tərəfin təklifini qəbul edib. Bu barədə Press TV məlumat verib.
"Biz ABŞ-la yoldaşlıq matçlarının keçirilməsində maraqlıyıq. Birinci görüş İran paytaxtı Tehranda keçiriləcək", - Əli Kəffaşiyan deyib.
Futbol qarşılaşmalarının dəqiq vaxtı bir qədər sonra müəyyənləşdiriləcək. İranın rəsmi idman nümayəndələri bildiriblər ki, İran və ABŞ millilərinin qarşılaşması İran Bədən Tərbiyəsi Beynəlxalq Şurası tərəfindən də bəyənilməlidir.
"ABŞ-ın qadınlardan ibarət milli futbol komandası İranın qadınlardan ibarət yığması ilə Tehranda görüşməyə hazır olduğunu bildirib. Hazırda bu məsələni müzakirə edirik", - Kəffaşiyan bildirib.
ABŞ və İran milli futbol komandaları 1998-ci ildə Fransada keçirilən Dünya Çempionatında qarşılaşıblar. Maraqlı keçən oyunda İran 2:1 hesabı ilə qələbə qazanıb.
İran və ABŞ arasında 1980-ci ildən etibarən diplomatik əlaqələr yoxdur.