Təfərrüatlar əlavə edilib (ilk xəbər saat 03:25-də yayılıb)
Azərbaycan, Bakı, 27 may / Trend /
Livanın cənubu tərəfindən bazar ertəsinə keçən gecə İsraili raket atəşinə tutmaq cəhdi olub. Bu barədə Trend RİA Novosti entliyinə istinadən məlumat verir.
Raket İsrail tərəfə Livanın cənubundakı Marcayun şəhərinin ətrafından buraxılıb.
Digər təfərrüatlar barədə məlumat verilməyib.
Reyter agentliyinin bildirdiyinə görə, İsrailin şimal hissəsindəki Metula şəhərinin yaxınlığında partlayış səsi eşidilib, lakin raketin düşməsinin dəqiq yeri məlum deyil.
"Hərbi quvvələr ərazidə axtarış aparırlar", - agentlik bildirib.
Bəzi məlumatlara görə, atəş zamanı minaatandan istifadə oluna bilərdi. İsrailə atəş açanın kimliyi hal-hazırda məlum deyil. Agentlik bildirib ki, Livanın cənubunda "Hizbullah" hərəkatının və bir neçə Fələstin qruplaşmasının döyüşçüləri fəaliyyət göstərir.
Daha əvvəl bazar günü "Qrad" reaktiv kompleksindən iki raketlə Beyrutun şəhərətrafının cənubunun atəşə tutulması nəticəsində dörd nəfər yaralanıb. Raketlərin düşdüyü ərazi "Hizbullah" şiə hərəkatının nəzarəti altındadır.
Raketlərin "Hizbullah" təşkilatının lideri şeyx Həsən Nəsrullahın şənbə günü Suriya Prezidenti Bəşər Əsədi öz çıxışında dəstəkləməsinə cavab olaraq atıldığı ehtimal olunur.