Bakı. Trend:
Telekanalın məlumatına görə, danışıqların əsas mövzusu Qəzza zolağında münaqişənin həlli olacaq.
Trend-in məlumatına görə, ABŞ dövlət katibi Entoni Blinken çərşənbə axşamı axşam Dohaya gəlib.
Blinkenin Dohada Əmir Şeyx Təmim bin Həməd Al Tani tərəfindən qəbul ediləcəyi gözlənilir. Danışıqların əsas mövzusu Qəzza zolağında İsrail və Fələstinin Həmas hərəkatı arasında münaqişənin həlli olacaq.
Avqustun 19-da ABŞ dövlət katibi Yaxın Şərqə səfəri çərçivəsində İsrailə gəlib və bu ölkənin prezidenti İsaak Hersoq və baş nazir Benyamin Netanyahu ilə görüşüb. Blinkenin sözlərinə görə, İsrail Qəzza zolağında münaqişənin həlli ilə bağlı ABŞ-ın təklifini qəbul edib. Çərşənbə axşamı günü Blinken Misir prezidenti Əbdülfəttah əs-Sisi ilə danışıqlar aparıb və o, Fələstin anklavında münaqişənin dayandırılması və onun daha da genişlənməsinin qarşısını almağa çağırıb.
Avqustun 15-də Qəzza zolağında atəşkəsə nail olmaq və HƏMAS-ın saxladığı girovların azad edilməsi üçün Dohada məsləhətləşmələrin yeni raundu başlayıb. Məsləhətləşmələrdən sonra Misir, Qətər və ABŞ-ın birgə bəyanatında qeyd olunub ki, danışıqlar “müsbət atmosferdə” keçib. Məsləhətləşmələr zamanı Birləşmiş Ştatlar Qətər və Misirin dəstəyi ilə HƏMAS və İsrail arasında fikir ayrılıqlarını azaldacaq bir təklif təqdim edib, mətndə deyilir. Lakin HƏMAS bildirib ki, ABŞ-ın yeni təşəbbüsü yalnız İsrailin maraqlarını nəzərə alır.