Azərbaycan, Bakı, 30 mart / Trend ", müxbir Q.Cəbiyev/ İqtidaryönlü Demokratik Azərbaycan Dünyası Partiyasının (DADP) aprelin 1-nə təyin olunan qurultayı təxirə salınıb. Bu barədə bazar günü Trend "a DADP sədri Məmməd Əlizadə məlumat verib.
DADP Əlizadə tərəfindən təsis olunub. Partiya hakimiyyətin həyata keçirdiyi siyasəti müdafiə edir və 1998-ci ildən iqtidaryönlü partiyaların Məşvərət Məclisində təmsil olunur.
Əlizadə deyib ki, qurultayın təxirə düşməsinə səbəb müəyyən məsələlərlə bağlı aydınlığın olmamasıdır. "Bizim əsas müttəfiqimiz, iqtidarda olan Yeni Azərbaycan Partiyasının qurultayının vaxtı hələ məlum deyil. Onların qərarını gözləyirik. Qurultayın təxirə düşməsinə digər səbəb isə yerlərdə qurultaya hazırlıq üzrə konfranslarımızın tam başa çatmamasıdır" Əlizadə əlavə edib. Onun sözlərinə görə, qurultay mayın sonlarında keçiriləcək.
Azərbaycanda prezident seçkisi oktyabrda keçiriləcək.
