Azərbaycan, Bakı, 08 may / Trend , müxbir İ.Əlizadə/ Azərbaycan müxalifət partiyalarının təmsil olunduğu Demokratik Seçki Mərkəzi Bakı şəhər İcra Hakimiyyətini məhkəməyə verəcək. "Bakı şəhər İcra Hakimiyyətinin Demokratik Seçki Mərkəzinin ayın 12-də planlaşdırdığı aksiyanın şəhərin mərkəzində keçirilməsinə icazə verməməsi qanunsuzdur. Ona gərə də İcra Hakimiyyətini məhkəməyə verəcəyik", - deyə cümə axşamı Trend -a açıqlamasında Demokratik Seçki Mərkəzinin həmtəsisçisi Teyyub Qənioğlu məlumat verib.
Demokratik Seçki Mərkəzində təmsil olunan partiyalar ayın 12-də Azərbaycan və Ermənistan arasında atəşkəs sazişinin imzalanmasının 14 -cü ildönümü ilə bağlı etiraz aksiyası keçirməyi planlaşdırırdı. Lakin Bakı şəhər İcra Hakimiyyəti aksiyanı şəhərdən kənarda yerləşən Bibiheybət stadionunda keçirməyə icazə verib. Təşkilatçılar Bibiheybətin uzaq olduğunu əsas gətirərək aksiyanı təxirə salıblar.
1994-cü il mayın 12-də Bişkekdə Azərbaycanla Ermənistan arasında cəbhə bölgəsində atəşin dayandırılması haqqında saziş imzalanıb. Sazişi Azərbaycan və Ermənistanın parlament sədrləri imzalayıb. Ermənistanın Azərbaycan qoşunlarının təmas xəttində atəşkəs rejimini tez-tez pozmasına baxmayaraq, Bişkek sazişi hələ də qüvvədədir.
Qənioğlu qeyd edib ki, Bakı şəhər İcra Hakimiyyətinin qərarı Konstitusiyaya, mövcud qanunlara ziddir və bunu məhkəmədə sübut edəcəklər.
