Azərbaycan, Bakı, 09 may / Trend , müxbir D.Xatınoğlu/ İranın növbəti çağırış Parlamentinin qarşısında duran əsas vəzifələri son 18 ildə yaranmış köklü iqtisadi problemlərin həll edilməsindən, əhalinin məşğulluğunun artırılması və dövlət büdcəsinə daha çox nəzarətin həyata keçirilməsindən ibarət olacaq. "İranın yeni tərkibli Parlamenti əsas fəaliyyətini iqtisadi problemlərin həllinə yönəldəcək" - deyə "Müşarikət" Partiyası Mərkəzi Şurasının üzvü xanım İlahə Kolayi (Elaheh Koolaee) Trend -a bildirib.
İranda inflyasiyanın səviyyəsi ən yuksək həddə - Mərkəzi Bankın mayın əvvəlinə olan hesabatına görə, 19,6 %-ə çatıb. Buna səbəb kimi hakimiyyətin dövlətin ehtiyat fondundan 135 milyard dollar vəsaiti daxili bazara sərf etməsi göstərilir. Ekspertlərin fikrincə, yüksək inflyasiya ölkədə iqtisadi böhrana səbəb ola bilər. Hazırda İran Parlamenti nümayəndələrinin ən çox qaldırdığı məsələlər də məhz ölkədə inflyasiyanın artması, işsizlik problemi ilə bağlıdır.
"Parlament əvvəlki tərkibdə hakimiyyətin iqtisadi planlarına çox zəif nəzarət edib, maliyyə pozuntularına qarşı yetərincə tədbirlər görməyib və ümumiyyətlə, hakimiyyətin iqtisadi siyasətinə çox laqeyd qalıb" - deyə Kolayi cümə günü telefonla Tehrandan bildirib. Onun sözlərinə görə, Mahmud Əhmədinejadın prezidentliyi dövründə hakimiyyət Parlamentdən icazəsiz dəfələrlə ehtiyat fondundan daxili bazara böyük həcmdə vəsait sərf edib və bu da ölkədə inflyasiyanın artması ilə nəticələnib. "İnanıram ki, növbəti Parlament hakimiyyətin müdafiəçisi kimi deyil, nəzarətçisi kimi fəaliyyət göstərəcək və qanunsuz hərəkətlərin qarşısını alacaq" - deyə Kolayi bildirib.
"Hakim partiya Parlamentin əvvəlki və indiki tərkibində çoxluq təşkil etsə də, nə Milli Məclis, nə də hakim partiya ("Üsulgəra Koalisiyası") xalqın tələblərini yerinə yetirə bilməyib" - deyə Parlamentin digər deputatı xanım Mehrəngiz Mürüvvəti Trend -a bildirib.
Onun fikrincə, İranda deputatlar əsasən hakimiyyəti dəstəkləyir, halbuki onlar daha çox xalqı müdafiə etməli, onun etimadını qazanmalıdırlar. "İranda inflyasiya və yoxsulluq xalqı çox pis vəziyyətə salıb, insanlar seçdikləri millət vəkillərindən əməli addımlar atmalarını tələb edirlər. "İslahatçı"ların isə hətta qeyri-demokratik şəraitdə keçirilən seçkilərdə belə uğur qazanması xalqın onlara etimad göstərdiyini nümayiş etdirdi" - deyə Mürüvvəti bu gün telefonla Tehrandan bildirib.
"Müstəqil deputatlar da "islahatçı" həmkarlarına qoşularaq hakimiyyətin iqtisadi siyasətinə nəzarəti artıracaq və iqtisadi planların daha intizamlı, qanunauyğun şəkildə həyata keçirilməsinə çalışacaqlar" - Mürüvvəti belə hesab edir.
İran Daxili İşlər Nazirliyi martın 14-də və aprelin 26-da keçirilmiş iki mərhələli Parlament seçkilərinin yekun nəticəsini aprelin sonunda açıqlayıb. Rəsmi nəticələrə görə, hakim partiya "Üsulgəra Koaliyasiyası" Parlamentdə çoxluq (71 faiz) təşkil edib. "İslahatçı" partiyalar isə Milli Məclisdə deputat yerlərinin 20 faizini qazanmağa nail olublar. Qalan 9 faizlik yerləri isə müstəliq deputatlar tutublar.
