Azərbaycan, Bakı, 13 may / Trend , müxbir E.Babayev/ Azərbaycanın müxalif Milli İstiqlal Partiyası (AMİP) qarşıdan gələn prezident seçkisini boykot etmək niyyətindədir. "Seçki Məcəlləsinə nəzərdə tutulan əlavə və dəyişikliklər müxalifətin seçkidə iştirakını məhdudlaşdırır və belə bir şəraitdə seçkidə iştirakın heç bir əhəmiyyəti yoxdur" çərşənbə axşamı Trend -a AMİP sədrinin müavini Əli Orucov deyib.
Seçki Məcəlləsinə əlavə və dəyişikliklər ayın sonunda parlamentdə müzakirəyə çıxarılacaq. Müxalifət əsasən namizədlərə dövlət televiziyasında və rəsmi qəzetlərdə pulsuz kampaniyanın aparılmasına qadağa qoyulmasından, seçki komissiyalarının tərkibinin dəyişdirilməsi ilə bağlı məsələyə toxunulmamasından narazıdır.
Seçki Məcəlləsinə əlavə və dəyişikliklər Azərbaycan hökuməti ilə Avropa Şurasının Venesiya Komissiyasının birgə müzakirələrindən sonra edilib.
Orucov hesab edir ki, müxalifətin televiziyaya çıxmaq imkanları tam məhdudlaşdırılır. "Ümumiyyətlə, belə bir şəraitdə hansısa siyahıda yer tutmaq naminə seçkidə iştirak mənasızdır"- deyən Orucov bildirib ki, əgər Milli Məclis Seçki Məcəlləsinə əlavə və dəyişiklikləri olduğu kimi qəbul etsə, AMİP boykot yolu tutacaq.
AMİP 1992-ci ildə yaradılan və Azərbaycanda ilk dövlət qeydiyyatına alınan partiyadır. Müxalifəti təmsil edən AMİP-in qurucusu və 2004-cü ilin sonunadək sədri olan Etibar Məmmədov hazırda Beynəlxalq Demokrat İttifaqının (BDİ) sədr müavinidir. Partityanın sədri Ayaz Rüstəmov bu ilin əvvəllərində səhhətində yaranan problemlə bağlı sədrlikdən istefa verib. Partiyanın yeni sədrinin seçilməsi üçün AMİP-in növbədənkənar qurultayının keçirilməsi planlaşdırılır.
Məqalə müəllifi ilə əlaqə ünvanı: [email protected]