Azərbaycan, Bakı, 23 may/ Trend , müxbir E.Babayev/ Müxalif Müsavat Partiyasının Bakı Şəhər İcra Hakimiyyətinə qarşı iddiası Səbail rayon məhkəməsi tərəfindən icraata götürülüb və hazırlıq iclası mayın 30-na təyin olunub. Bu barədə cümə günü Trend -a Müsavatın Mərkəzi İcra Aparatının rəhbəri Arif Hacılı məlumat verib.
Trend -un arayışı: Müsavat mayın 4-nə, daha sonra isə 18-nə təyin etdiyi aksiyaları təxirə salıb. Buna səbəb kimi Bakı Şəhər İcra Hakimiyyətinin aksiyanın partiyanın istədiyi yerlərdə (Füzuli meydanı, "Təbriz" (keçmiş "Sevinc") kinoteatrı, Ukrayna meydanı, keçmiş "Qələbə" kinoteatrının qarşısı və "Nərimanov" metrostansiyası qarşısı) yox, "Bibiheybət" qəsəbəsində keçirilməsinə icazə verməsidir. Partiya mayın 4-də keçirilməsi gözlənilən aksiyaya icazə vermədiyi üçün meriyanı məhkəməyə verib.
Hacılı bildirib ki, prosesə hakim Nəsibov sədrlik edəcək.
Müxalifəti təmsil edən Müsavat Partiyası 1992-ci ildə yaradılıb. Partiyanın başqanı İsa Qəmbər Azərbaycan parlamentinin eks-spikeri (1992-93-cü illərdə) və 2003-cü ildə keçirilmiş prezident seçkisində prezidentliyə namizəd olub. Partiya beş nəfər deputatla parlamentdə təmsil olunur.
Məqalə müəllifi ilə əlaqə ünvanı: [email protected]
