Azərbaycan, Bakı, 26 noyabr / Trend , müxbir C.Babayeva/ Bakı Şəhər İcra Hakimiyyəti çərşənbə günü müxalif Müsavat Partiyasının gənclər təşkilatının noyabrın 27-də Gənclər və İdman Nazirliyinin qarşısında piket keçirməklə bağlı müraciətini cavablandırıb.
"Cavab məktubunda Nazirliyin gənclərlə bağlı bir sıra tədbirlər təşkil etdiyi göstərilib və piketin keçirilməsi məqsədəuyğun hesab edilməyib. Bakı Şəhər İcra Hakimiyyəti təşkilatımızı narahat edən problemlərlə bağlı Nazirliyə müraciət etməyi məsləhət görüb", - deyə çərşənbə günü Trend -a Müsavat Partiyasının gənclər təşkilatının sədri Tural Abbaslı məlumat verib.
Trend -un arayışı: Müsavat Partiyasının gənclər təşkilatı "Gənclər arasında siyasi ayrıseçkiliyə son qoyulsun!" şüarı ilə Gənclər və İdman Nazirliyinin qarşısında piket keçirmək niyyətində idi.
İcazəsiz aksiyanın keçiriləcəyinə gəlincə, Abbaslı bildirib ki, bu cür aksiyanın keçirilməsi partiya rəhbərliyi ilə razılaşdırılmalıdır. "İcazəsiz piketin keçirilməsinə qərar verilsə, polislə qarşıdurmanın yaranmaması məqsədilə aksiyanın keçirilmə tarixi elan olunmayacaq", - deyə o bildirib.
Məqalə müəllifi ilə əlaqə saxlamaq üçün ünvan: [email protected]
