Azərbaycan, Bakı, 29 mart / Trend , müxbir D.Xatınoğlu /
Rusiyada keçirilən Şanxay Əməkdaşlıq Təşkilatının Əfqanıstanla bağlı iclasının prespektivlərini müsbət dəyərləndiririk, həmçinin Əfqanıstan təhlükəsizliyi ilə bağlı Hollandiyada keçiriləcək iclasda rəsmi Tehranın iştirakını xüsusi dəstəkləyirik, - Əfqanıstan müdafiə nazirinin sözçüsu general Zahir Əzimi Trend -a bildirib.
General Əzimi Əfqanıstanın təhlükəsizliyi ilə bağlı Rusiyada keçirilən Şanxay iclasını müsbət dəyərləndirərək, bu təşkilatın ölkədə sabitliyin yaradılmasında böyük potensiala malik olduğunu vurğulayıb.
Şanxay Əməkdaşlıq Təşkilatı (Rusiya, Çin, Tacikistan, Qazaxıstan, Qırğızıstan, Özbəkistan) martın 28-də Əfqanıstanın təhlükəsizliyi ilə bağlı Moskvada iclas keçirib. Bu təşkilata İran və Pakistan müşahidəçi qismində üzvdur.
Əzimi Şanxay ilə NATO qüvvələrinin Əfqanıstan ərazisində müştərək fəaliyyət göstərməsinin perspektivinə və bu əməkdaşlığın hansı çərçivədə olacağına dair açıqlama verməsə də, beynəlxalq ictimaiyyətin Əfqanıstanın təhlükəsizliyi, inkişafı və dirçəlişi uğrunda həmrəy olmasının vacibliyini vurğulayıb. "Şanxay, NATO və digər qüvvələrin birlikdə, yaxud ayrılıqda ölkəyə yardım göstərmələrini xahiş edirik", - deyə Əzimi cümə günü Kabildən telefonla bildirib.
İran XİN sözçüsu Həsən Qəşqavi cümə axşamı rəsmi Tehranın nümayəndəsinin də Əfqanıstanın təhlükəsizliyi ilə bağlı gələn həftə Hollandiyada keçiriləcək iclasda iştirak edəcəyini bildirib. Hollandiyada keçirilən iclasda, həmçinin NATO-ya üzv ölkələr və ABŞ nümayəndəsi iştirak edəcək. ABŞ İranın Hollandiyada keçiriləcək iclasda iştirakını dəstəkləyib, baxmayaraq ki, İran tərəfi bu iclasa hansı səviyyədə nümayəndə göndərəcəyini elan etməyib.
General Əzimi İranın Hollandiyada keçiriləcək "Əfqanıstanın gələcəyi" adlı iclasda iştirakını müsbət dəyərləndirərək bildirib ki, rəsmi Tehran Əfqanıstana böyük yardım göstərə bilər. "Bizim İranla çox böyük müştərək sərhədlərimiz var. Bu sərhədlər narkobizneslə məşğul olan Taliban üzvlərinin əsas tranzit yoludur. Həmçinin hazırda İranda bir milyona yaxın (900 mindən çox) əfqanistanlı mühacirin yaşamasını da nəzərə almaq lazımdır", - Əzimi bildirib.
Rəsmi Tehran NATO və ABŞ hərbçilərinin Əfqanıstanda qalmasının əleyhinədir, həmçinin Şanxay Əməkdaşlıq Təşkilatı NATO-ya rəqib bir təşkilat kimi yaranıb. Əzimi İran və Şanxay-a üzv ölkələrin NATO, İSAF (International Security Assistance Force) və ABŞ qüvvələrinin Əfqanıstanda xidmət göstərməsi ilə bağlı fikir ayrılığı yaratmayacağına ümid etdiyini bildirib.
