Azərbaycan, Bakı, 22 iyun / Trend , müxbir C.Babayeva /
Azərbaycanın müxalifyönlü Müasir Müsavat Partiyası (MMP) İranda azərbaycanlılara qarşı repressiyalara və təzyiqlərə etiraz olaraq birgə mitinq keçirmək təşəbbüsü ilə çıxış edib.
"Müxalifət partiyalarına Bakıda birgə mitinq keçirilməsi ilə bağlı müraciət olunacaq. Mitinqdə İranda prezident seçkisinin nəticələrinin saxtalaşdırılması və orada yaşayan azərbaycanlıların hüquqlarının pozulmasına etiraz bildirilməlidir", - bazar ertəsi Trend -a MMP sədri Hafiz Hacıyev bildirib.
Trend -un arayışı: Tehranda şənbə günü polislə toqquşmalar nəticəsində 19 nəfər həlak olub, bu barədə CNN xəstəxanadakı mənbəyə istinadən bildirib.
İranda iyunun 12-də keçirilmiş seçkilərin nəticələri ilə razılaşmayan minlərlə insan etiraz aksiyaları keçirib ki, bu da polislə toqquşmaya səbəb olub. Seçkilərin nəticələrinə əsasən, Əhmədinejad seçicilərin 63,6 faizinin səsini toplayıb.
Təsdiqlənməmiş məlumatlara əsasən, küçə toqquşmaları nəticəsində 150 nəfər həlak olub.
Polis nümayişçilərin dağıdılması üçün gözyaşardıcı qazdan, dəyənək və su şırnağından istifadə edib.
Qeyri-rəsmi məlumatlara əsasən, İranda yaşayan azərbaycanlıların sayı 30 milyondan çoxdur.
Hacıyev Azərbaycanın müxalifət partiyalarının İrandakı azərbaycanlıların hüquqlarının tapdanmasına göz yummasından təəssüfləndiyini bildirib. "Partiyalar arasında yalnız Müasir Müsavat İrandakı soydaşlarımızın müdafiəsinə qalxdı və etiraz aksiyası keçirdi. Bu cür aksiyaları davamlı olaraq keçirəcəyik. Müxalifət partiyaları müəyyən məsələlərdə ikili standartlar nümayiş etdirir", - MMP sədri deyib.
Məqalə müəllifi ilə əlaqə ünvanı: [email protected]
