Azərbaycan, Bakı, 05 avqust / Trend , müxbir A.Hüseynbala /
Azərbaycan hakimiyyətinin siyasi kursunu dəstəkləyən partiyada bələdiyyə üzvlüyünə namizəd irəli sürülməsində problem yaranıb.
"Partiyamızın yerli təşkilatlarının bəzi üzvləri bələdiyyələrin statusunun az olmasını səbəb gətirərək namizədliklərinin irəli sürülməsinə razılaşmırlar", - çərşənbə günü Trend -a Vəhdət Partiyasının sədri Tahir Kərimli bildirib.
Trend -un arayışı: Azərbaycanda bələdiyyə seçkisi 2009-cu ilin dekabrında, parlament seçkisi isə 2010-cu ilin payızında keçirilməlidir. Bundan əvvəl iki dəfə - 1999 və 2004-cü illərdə yerli özünüidarəetmə orqanlarına seçkilər keçirilib.
May ayında Azərbaycan parlamentində "Bələdiyylərin birləşdirilməsi haqqında" qanun qəbul edilib. Qəbul edilən qanuna görə, Azərbaycanda bələdiyyələrin sayı 2757-dən 1766-ya enib.
Kərimlinin sözlərinə görə, partiyanın bələdiyyə üzvlüyünə nə qədər namizəd irəli sürəcəyi sentyabr ayında tam dəqiqləşdiriləcək. "Biz seçkilərdə təkbaşına iştirak etmək haqda qərar vermişik. Buna baxmayaraq, hakim Yeni Azərbaycan Partiyasının daha şanslı namizədləri olan bələdiyyələrdə öz namizədlərimizi irəli sürməyəcəyik", - partiya sədri əlavə edib.
Onun fikrincə, seçkilərdə digər partiyalarla əməkdaşlıq etmək ehtimalı da mümkündür. "Bu əməkdaşlıq hansısa dairədə vahid namizədin dəstəklənməsi yox, sadəcə birgə təbliğat kampaniyasının aparılması, səsvermənin gedişinin birgə müşahidə edilməsi formasında ola bilər", - Kərimli vurğulayıb.
Аzərbаycаn Аli Məhkəməsinin kеçmiş sədri, sаbiq millət vəkili Кərimlinin rəhbərlik еtdiyi Vəhdət Pаrtiyаsı 2006-cı ilə qədər müхаlifət mövqеyində оlub. Pаrtiyа hаzırdа iqtidаrın siyаsi kursunu dəstəkləyir.
Məqalə müəllifi ilə əlaqə ünvanı: [email protected]
