Azərbaycan, Bakı, 19 avqust /Trend, müxbir T.Hacıyev/
Azərbaycanın müxalif Müsavat Partiyası Mərkəzi İcra Aparatının sədri Arif Hacılı ilə Azərbaycan Xalq Cəbhəsi Partiyası sədrinin siyasi məsələlər üzrə müavini Fuad Qəhrəmanlı arasında görüş keçiriləcək.
"Görüşdə hələ də razılaşdırılmamış bəzi dairələr ətrafında fikir mübadiləsi aparılacaq. Müsavatın AXCP-yə güzəştə gedəcəyi dairələr və AXCP-nin Müsavata güzəştə gedəcəyi dairələr müzakirə olunacaq", - bu barədə cümə günü Trend-ə Müsavat Partiyası mərkəzi icra aparatının rəhbəri Arif Hacılı bildirib.
İyulun 15-də AXCP-nin yaranmasının 21 illiyinə həsr olunmuş tədbirdə Müsavat başqanı İsa Qəmbər AXCP ilə Müsavatın birləşərək bir partiya olmasını təklif edib. Hazırda hər iki partiyanın birgə seçki bloku yaratması ətrafında danışıqlar aparılır.
Onun sözlərinə görə, görüş zamanı qəbul edilmiş qərarlar sonradan partiyada müzakirə olunacaq.
Azərbaycanda Parlament seçkilərinin 2010-cu ilin noyabr ayının 7-də keçiriləcəyi gözlənilir. Bundanəvvəlki seçkilər 2005-ci ilin noyabr ayında keçirilib. Azərbaycanda Parlament seçkiləri majoritar sistem üzrə 125 seçki dairəsində aparılır.
