Ərdoğan: "Azərbaycana səfərim zamanı Gülən hərəkatını müzakirə etdik"
Azərbaycan, Bakı, 8 aprel /Trend, müxbir R.Hafizoğlu/
Türkiyənin Baş naziri Rəcəb Tayyib Ərdoğan Azərbaycana səfəri zamanı bir çox məsələlərlə yanaşı, Gülən hərəkatının fəaliyyətini də müzakirə etdiyini bildirib. Trend-in "TRT Haber"-ə istinadən verdiyi məlumata görə, Ərdoğan bunu hakim Ədalət və İnkişaf Partiyasının (AKP) qrup toplantısında söyləyib.
Bir qədər əvvəl Türkiyənin Baş naziri Rəcəb Tayyib Ərdoğan Fətullah Gülən hərəkatının fəaliyyətinin hökumətin zəiflədilməsinə yönəldiyini bəyan edib.
Daha sonra Ərdoğan Fətullah Gülənin ABŞ-dan ekstradisiyasının mümkünlüyünü qeyd edib. Onun sözlərinə görə, Türkiyənin daxili işlərinə müdaxilə edən, ölkədə sabitliyin pozulmasına yol açan Gülənin ABŞ-dan ekstradisiyasına nail olmaq mümkündür.
Bir müddət əvvəl Türkiyənin ədliyyə naziri Bəkir Bozdağ bildirib ki, Fətullah Gülənin İnterpol xətti ilə axtarışa verilməsi gündəmə gətirilə bilər. Ədliyyə naziri bu qərarın məhkəmə tərəfindən verilə biləcəyini deyib.
ABŞ Dövlət Departamentinin nümayəndəsi Mari Harf Fətullah Gülənin ekstradisiyasıının qeyri-mümkün olduğunu bildirib.
